Самараның Камышлы авылында үсмер кызларга яулык бәйләргә өйрәттеләр
(Казан, 19 декабрь, «Татар-информ»). Самараның Камышлы авылының «Ак калфак» оешмасы әгъзалары мәктәптә үсмер кызлар өчен яулык бәйләү буенча мастер-класс уздырды. Бу турыда «Самара татарлары» сайтында хәбәр ителә.
Камышлы районының «Туган як» дип аталган җирле иҗтимагый оешмасы президенты Раилә Нәгыйм кызы иң баштан яулыкларның күп төрле булуын аңлатты, күрсәтте.
«Хатын-кыз күрке — яулык, ә ак яулык — күңел көзгесе. Яулыкларда татар халкының тарихы да чагыла. Элегрәк өчпочмаклы яулык кына бәйләгәннәр. Тора-бара фабрикаларда дүртпочмаклы яулыклар барлыкка килгән. Татар хатын-кызлары аны үзебезнең милли гореф-гадәтләренә туры китереп бөркәнгәннәр. Зур-зур чәчәкле матур зәңгәр, кызыл, яшел шәлләрне аркаларына япканнар», дип сөйләде ул.
Француз яулыклары турында да искә төшерде ул.
Яулык кына дисәк тә, аларда тарих чагыла. Төсе, бизәкләре, тукымасының сыйфаты — һәрберсе үз чорының узенчәлеге турында сөйли, халкымның сәнгать үрнәкләрен чагылдыра. Ак яулык хатын-кызның сафлык билгесе булган. Күп вакыт хатын-кызларга яулык бүләк иткәннәр. Хезмәтен тутырып кайткан ир-егетләр дә буләк итеп яулык алып кайта торган булганнар. Егет яраткан кызына яулык буләк иткән.
Укучы кызлар да аллы-гөлле, бизәкле яулыклар, шәлләр алып килгәннәр иде. Аларга палантин яки шарф бәйләргә өйрәттеләр.