Ростов өлкәсендә 60 яшьлек хатын, фермага эшкә алмагач, үч итеп ут төрткән. Бу турыда «Комсомольская правда» яза.
Натальяның бик тә сыер савучы буласы килә. Биредә яшәүчеләр сүзләренчә, Наталья гел кызу канлы хатын була. Фермада эшләүче ир-ат белән яши башлагач, ул сөйгәненә тагын да якынаерга тели, шул ук хуҗалыкка эшкә урнашырга була. Ул үзеннән бик шәп сыер савучы чыгасына шикләнми.
Наталья ферма директоры янына китә. Барышлый, сыер абзарына керә. Биредә эшләүчеләр белән сөйләшеп ала, талашырга да өлгерә.
Җитәкче аны эшкә алмый, Наталья кайтып китә. Үч алу планын кора.
Аннары ул фермага әйләнеп килә. Элек эшчеләр өчен булган бытовка һәм вагончикка коры үлән ташлый, шырпы сыза. Корылмалар бик тиз янып бетә. Зыян 500 мең сум чамасы була.
Ут төртүченең шәхесен тиз ачыклыйлар. Аның койма аша чыкканын, бытовкага үлән алып килгәнен видеокүзәтү камерасы төшереп тора.
Өстәвенә, ул, ут төрткәч, ферма җитәкчесен очрата, директор төтен чыккан урынга таба чаба. «Наталья, синең эшеңме?» – ди ул. Наталья исә усал елмая.
Сорау алганда ул гаебен таный, ул, сыерлар белән вәхши кыланган өчен үч алдым, дип белдерә.
Суд бу хатынны гаепле дип таба, 1,5 елга шартлы рәвештә ирегеннән мәхрүм итәләр, зыянны түләттерәләр, диелә хәбәрдә.
