Мәскәүнең Рязань проспектында Россия хәрби көчләренең радиция, химия, биологиядән саклау гаскәрләре начальнигы – генерал-лейтенант Игорь Кирилловны шартлатып үтергәннәр.
Ике хәрби (берсе – Кириллов, икенчесе – аның ярдәмчесе) подъезддан чыгып барганда шартлау яңгырый. Ул шулкадәр көчле була – подъезд янында торган автомобильләр, шул исәптән, генерал автомобиле зыян күрә, беренче каттагы тәрәзәләр ватыла, подъезд ишеге каерылып ташлана.
Шартлаткыч ишек янында торган самокатка беркетелгән булган дип фаразлыйлар. Шартлау җирдән бер метр биеклектә була, шартлаткыч самокатның руленә беркетелгән булырга мөмкин.
Самокатны шартлауга кадәр берничә сәгать алдан подъезд янында калдырып китәләр. Тикшерүчеләр фаразы буенча, үтерүче подъезд янында булмаска да мөмкин. Йортта камера эшләгән һәм аны теләсә кем карый алган. Үтерүче камерадан карап торып генералның чыкканын күрергә һәм аны шартлатырга мөмкин, дип яза ШОТ.
