Башкортстанның Белорет районында урманда гөмбә җыйганда, 65 яшьлек Татьяна югала. Ул 3 көн адашып йөри. Бу турыда Башкортстан буенча Гадәттән тыш хәлләр министрлыгы хәбәр итте.
Ир белән хатын бергә гөмбәгә бара. Аннары алар, мавыгып китеп, бер-берсеннән шактый ераклашалар. Бераздан Татьяна бөтенләй күзгә күренми башлый.
Татьянаны көтүче очраклы гына табып ала.
«Мин бу урынга инде 15 ел йөрим, бөтен сукмакларны беләм. Ләкин бу юлы бик мавыгып киткәнмен, аннары урынны танымавымны аңлап алдым. Урманда адашып йөрдем, сазлыкка килеп чыктым. Аннары көн сүрелә башлады, алга бару куркыныч иде. Каенга менеп, шунда төн чыктым. Җиләкләр ашап тордым, яңгырдан соң җыелган күлләвектән су эчтем», – ди ул.
