Махсус хәрби операция зонасына күп тапкырлар гуманитар ярдәм илтүче, андагы егетләр белән гел элемтәдә торучы Мөслим районы егете Рүзәл Минһаҗев тагын бер югалту турында яза.
«Бу югалтулар башны күтәрмәслек итә инде... Беренче тапкыр СВО зонасына барып, иң тәүге очраткан якташым иде ул. Бүген ул безнең арабыздан мәңгелеккә китте. Хуш, Ыртабис дустым. Әй, бетте инде йөрәкләр. Югалтулар сындыра күңелне. Бәхил бул, Ташлыярның батыр Ыртабисы», – дип язган ул социаль челтәрдә.
Комментарийлардан аңлашылганча, Ыртабис – Айдар исемле егет. «Эхх, Айдар дустыбыз, урының оҗмахта булсын. Әниеңә, гаиләңә, туганнарыңа күркәм сабырлык бирсен бер Аллакаем», – дип язып калдырганнар.
