Чаллы социаль челтәрләрендә 56нчы мәктәпнең футбол кырында булган коточкыч очрак турында кызу фикер алышулар бара. Монда, туганнары сүзләренә караганда, яшүсмерләр инвалид малайга карата мыскыллы гамәлләр кылган: аңа туп белән сукканнар, ыштанын салырга мәҗбүр иткәннәр һәм шәрә килеш фотога төшергәннәр, шуннан соң акча таләп иткәннәр.
Өлкән яшьтәге ханым олы оныгы Рәсимгә 12 яшь булуын әйтте (исеме этик сәбәпләр буенча үзгәртелде – искәрмә. ред.). Туганнан соң ук табиблар аңа берничә диагноз куйган, шул исәптән күрү проблемалары белән бәйле. Малай күзләренә берничә операция кичергән, алар авыру үсешен генә туктаткан. Баланың инвалидлыгы бар, ул начар күрүчеләр өчен махсус мәктәптә укый.
«Аның гаиләсе 56 нчы комплекста яши. Тик ял көннәрендә Рәсим минем янда 62 нче комплекста еш була, каникулларда озак кала. Минем ике оныгым бар, аларның яшь аермасы алты яшь, кечесе сәламәт, акыллы булып үсеп килә, еш кына өлкәне артыннан «койрык» булып ияреп йөри. Ә безнең Рәсим үзенчәлекле, холкы ягыннан яхшы күңелле, беркатлы, сугыш чукмары түгел. Ул авыр сөйләшә. Әмма безнең микрорайонда малайны яхшы беләләр. Аны беркемнең дә рәнҗеткәне булмады. Шуңа күрә мин аның белән берни дә булмаячак дип ышана идем», - ди әбисе.
Аның сүзләренә караганда, 22 июнь иртәсендә яңгыр яуган. Шуңа күрә оныгы йөреп кайтырга җыенгач, әбисе аңа спорт жилетын кидергән. Берникадәр вакыттан соң малай кире кайта, ләкин өстендә жилеты булмый.
«Бусагада футболка кигән килеш басып тора һәм «Әби, акча бир әле», - дип сорады. «Нигә?» – дип сорадым. Кола сатып алырга ди. Мин «Хәзер кибеткә бергә барырбыз, үзем сатып алырмын», - дидем. Жилеты турында сорадым: «Кайда югалттың?» – дидем. Кече оныгым Рәсимнең киеме мәктәп территориясендә футбол кыры янында аунап ята, диде. Мине аның анда йөрүе гаҗәпләндермәде - футбол карарга ярата иде», - дип сөйли хатын.
Аның сүзләренә караганда, Рәсим аны көтеп тормыйча өйдән чыгып киткән, аннары инде киеме белән кайткан һәм тагын акча сораган. Әбисе акча бирмәгән…
Соңрак әби оныклары белән ишегалдына чыга. Малайлар шунда калалар, ә ул эшләре буенча китә – почтага, кибеткә, икмәк пешерү цехына керә. Кайткач кечкенә оныгының ишегалдында самокатта йөрүән күрә, ә олысы анда булмый. Абыйсын төшке ашка чакырырга куша.
«Балалар өйгә кайттылар. Рәсимнең йөзе качкан, күзләре шок хәлендә иде. Сораштыра башладым, малай рәтләп берни дә әйтә алмый. Шул арада кечкенәсе барысын да аңлатып бирде: мәктәп артындагы кырда футбол уйнаган өлкән балалар Рәсимнең эченә, башына туп белән бәргән, аннары ыштанын салдырган, билдән түбән фотога төшергәннәр. Көлешкәннәр, акча алып кил, югыйсә бу фотоларны интернетка чыгарабыз, дигәннәр», - ди әби кеше.
Ул ишеткәннәреннән чәчләре үрә торуын әйтә. Рәсимнең әти-әнисенә шалтырата. Әтисе шундук килә. Футбол кырына бара, ләкин анда инде беркем дә булмый.
Әлеге вакыйга шимбә көнне була. Дүшәмбе көнне әти-әнисе «Электротехнический» полиция бүлегенә гариза яза. Зыян күрүченең туганнары мәктәпкә бара, анда аларга мәйданчыкта футбол командасы спортчылары шөгыльләнүен, шулай ук ишегалды егетләренең дә туп тибүен әйтәләр.
«Футбол кыры мәктәп территориясендә урнашкан булса да, ул ачык тора. Чөнки комплекста балалар өчен ял итү урыннары күп түгел», - диләр учреждениедә.
«Челнинские известия» ачыклау сорап мәктәпкә мөрәҗәгать итә. Анда «Бу инцидентта безнең укучыларның катнашы юк. Аның мәктәпкә бернинди катнашы юк», - дип җавап бирәләр.
«Без Рәсимне кемнәр мыскыл иткәнен беләбез. Мин социаль челтәрләрдә язгач, минем телефонга хәбәрләр яуды. Футбол кырында малайларны күргән кешеләр табылды. Фотосурәтләр җибәрә башладылар. Һәм без катнашы булганнарны ачыкладык. Алар чыннан да безнең мәктәп укучылары түгел», - диде малайның әбисе.
Әби кеше эш озакка сузылыр дип курка.
«Безне судмедэкспертиза нәтиҗәләре белән таныштырмадылар, камералардан алынган видеоны күрсәтмәделәр. Онык үзе чишенгән, диделәр. Без әлегә әйтелгәннәргә каршы килмибез. Чөнки моның өчен, ким дигәндә, материалны күрергә кирәк. Ләкин тагын бер кат ассызыклыйсым килә – Рәсим үзенчәлекле бала, ул беркайчан да кешеләрнең мәрхәмәтсезлеге белән дә, мәкерлелеге белән дә очрашмады! Ә хәзер без аңа психологик җәрәхәт нәтиҗәләрен җиңәргә ничек ярдәм итәргә икәнен белмибез», - ди чаллылы.
Билгеле булганча, 56 нчы мәктәпнең футбол кырында булган факт буенча җинаять эше кузгатылган.
«Челнинские известия» сайтыннан тәрҗемә.
