17 июньдә Чаллының «Тәүбә» мәчетендә Татарстанның һәм Россиянең атказанган табибы Рушания Сәгъдиева белән хушлаштылар. Шимбә көнне иртәнге 7дә аны ире атып үтергән.
Раушания ханым турында истәлекләре белән Чаллыда чыга торган «Мәйдан» журналының баш мөхәррире Ризидә Гасыймова социаль челтәрдә уртаклашты.
«Чаллы бик күпләр өчен терәк булган танылган невропатолог Раушания Гаяновнаны соңгы юлга озатты. Ул минем бердәнбер элемтә тоткан табибым иде. Хәлне күрүгә аңлый, артык сораулар биреп тормый. Һәм ничектер куркытмыйча, кара төсләрне артык куертмыйча, оптимизм белән дәвалый белә. Узган җәй бик борчулы вакытымда барып кердем аның янына.
Ризидә, – диде ул, – игътибарыңны читкә юнәлтергә өйрән әле. Отвлекайся! Синдә генә дип уйлыйсыңмени проблемаларны? Миндә дә бик күп алар.
Шуннан соң, очрашканда, ул – минем хәлләрне, мин аныкын: милек өчен судлашып йөргән ире белән мөнәсәбәтләрен сорашырга күнектек. «Судның очы-кырые күренми әле, – дип җавап биргән иде ул соңгы мәртәбәсендә. – Минем инде аңа исем китми». Ләкин низаг, сугыш – куркыныч нәрсәләр шул инде алар. Анда (кызганыч) җиңүчеләр булмый», – дип яза Ризидә Гасыймова.
67 яшьлек Рушания ханым 72 яшьлек ире белән аерылышкан була, һәм соңгы елларда алар судлар аша милек бүлешкәннәр. Гаилә таркалгач, йорт Рушания Сәгъдиевага калган, судлар уртак шәхси клиника өчен барган.
Фаҗига булган көнне Рушания Сәгъдиева кызы һәм оныгы белән өендә була. Элеккеге ире аларга «Сайга» дигән ау мылтыгын гитара чехолына салып килә, кулында торт була. Йортта ярдәмче булып эшләүче олы яшьтәге ханым ирне йортка кертә. Ир аерылган хатынына ата, ике арага кергән кызларының иңбашын яралый. Канга баткан кызлары, ярдәм сорап, урамга чыгып йөгерә. Ир хатынын башына һәм күкрәгенә атып үтерә һәм үзенә дә кул сала.
Ир оныгын тоткын итеп алган була, полиция килә. Аннары төгәл билгеле түгел – әллә алар штурм башлый, әллә ярсыган ир үз-үзенә кул сала. Бала исән-сау.
Аерылган хатынын атып үтергәннән Рафаэль Сәгъдиевның кайда, кайчан җирләнәчәге билгесез. Кызы аны озатуда катнашмаячак.
