Мәскәүдә элеккеге сөйгән кызын поезд астына төртеп төшергән ир-атны суд сак астына алган. Бу турыда РЕН ТВ хәбәр итте.
Шәһәрнең гомуми юрисдикция судлары матбугат хезмәте белешмәсе буенча, «Маторин Антон Михайловичка карата 2 айга, 2024 елның 14 маена кадәр, сак астына алу чикләү чарасы билгеләнә». Ул үтерергә маташуда гаепләнә.
13 мартта «Войковская» станциясендә 39 яшьлек ир-ат сөйгән кызын платформага егып сала, аннары килә торган поезд астына төртеп төшерә.
Кыз үзен кулга алырга өлгерә, ул махсус улакка кереп, исән кала.
Ир-ат гамәлләрен үзенчә аңлата, ул сөйгән кызы аның белән араны өзгәч шушы эшкә баруын әйтә. Сорау алганда гаебен таныган, үкенүен әйткән, диелә хәбәрдә.
РЕН ТВ белешмәсе буенча, поезд машинисты яшен тизлегендә эшли – состав кызга берничә сантиметр ераклыкта туктап кала.
Кызга 29 яшь, алар Антон белән ярты ел очрашып йөргән, икәү бергә фатир арендалап та торганнар. Ләкин аннары кыз Антон белән аерылышырга була. Кыз яхшылап кына китәргә тели, тик егет каршы була. Ул кызны инде 1 елдан артык эзәрлекләп йөргән. Фаҗига булган вакытта алар кабат метрода очрашкан, һәм талаш чыккан. Ир-ат корбанына кисәк кенә ташланган, аннары качып китмәкче булган. Ләкин аны тоткарларга шаһитлар ярдәм итә һәм полициягә тапшыралар.
Кыз физик яктан зыян күрмәсә дә, бик көчле эмоциональ стресс халәтендә, диелә хәбәрдә.