Фигуралы шуу буенча Олимпия чемпионы Роман Костомаровның аягын тезенә кадәр ампутацияләргә мөмкиннәр. Бу турыда РЕН ТВ каналы үз чыганакларына сылтама белән хәбәр итте.
Моңа кадәр Роман Костомаровның аяк бармакларын ампутациялиләр дигән хәбәрләр чыккан иде. Тик хәзер тукымалар күбрәк мәйданда зарарланган булу ихтималы ачыкланган.
45 яшьлек спортчының сәламәтлеген көн саен күзәтеп торалар.
«Ампутация турында соңгы карарны табиблар консилиумда хәл итәчәк», – дигән РЕН ТВ чыганагы.
Роман Костомаровның хастаханәдә ятуы турында 10 гыйнварда билгеле булды. Анда пневмония була. Грипп һәм коронавируска тестлар тискәре нәтиҗә күрсәтә.
Яңа ел бәйрәмнәрендә Костомаров боз тамашаларында эшли, аннары йөткерә башлый, ашыгыч ярдәм чакыралар. Бер тәүлек узгач аны Коммунаркадагы хастаханәдә ИВЛ, ЭКМО аппаратларына тоташтыралар. Йөрәге белән проблемалар башлана.
28 гыйнварда Костомаровның температурасы төшү, хәле яхшыру турында билгеле булган иде, диелә хәбәрдә.
