Җырчы Ләйсән Гыймаева моннан 1 ел элекке хатирәләре белән социаль челтәрдәге сәхифәсеңдә уртаклашкан.
Бер ел элек бу вакытта җырчының хәлләре әйтүле булмаган (гәрчә, бу турыда ул вакытта аның танышлары, тамашачысы, виртуаль дуслары берни белмәсә дә). Нәкъ менә Яңа ел алдыннан Ләйсәндә яман чир булуы ачыкланган. Диагнозны ишеткәч тә, былтыр декабрь башларында Ләйсәнне ире Булат Бәйрәмов Төркиягә Истанбул шәһәренә, начар уйлардан әзрәк арындырырга, онытылып торырга дип, сәяхәткә алып киткән булган. Ә декабрь азагында җырчыга операция ясаганнар...
«Архивтан бер фото таптым әле. Узган елгы, 31 декабрь төшерелгән... Хастаханәдә... Операциядән соң аякка басып, әкрен генә йөри башлагач...
Булат, бераз минем кәефне күтәрергә дип, матур букет алып килгән иде, ә кызлардан – открытка. Димәк, 1 ел узган да киткән...
Иң кадерле бүләкләр. Иң кадерле котлау сүзләре бу. Шушы балалар хакына гомер, сәламәтлек бир, Раббым, дип теләдем мин ел буе. Моннан соң да теләячәкмен. Бу сынаулар артта калсын, алда якты матур көннәр көтсен. Якынлашып килүче Яңа ел белән! Иң мөһиме – сәламәтлек», – дип язган Ләйсән сторисларында һәм кадерле кешесеннән хастаханәгә килгән чәчәк бәйләме белән газизләренең котлау хатларының фотоларын куйган.
Фотолар: Ләйсән Гыймаеваның социаль челтәрдәге сәхифәсеннән
