«Татар җыры» премияләрен тапшыру тантанасында Эльмира Сөләйманованы искә алдылар.
«Барс Медиа» бик күп артистларны халыкка чыгарды. Аларның берсе – «Татар җыры» премиясенә ия җырчы, Татарстанның атказанган артисты Эльмира Сөләйманова. Ул кичә безнең арадан китеп барды», – диде сәхнәдән Гөлназ Сәфәрова.
Экранда Эльмира Сөләйманова видеолары күрсәтелде, аның башкаруындагы «Балакаем, балан ачы» җыры яңгырады.
«Күңел кошы Эльмира Сөләйманова, хуш. Бүген аны искә төшерүбез җырчыга дога булып барсын», – диде Искәндәр Хәйруллин.
«Кеше китә, җыры кала», – диде Гөлназ Сәфәрова.
«Барс-Медиа» компанияләр группасы директорлар советы рәисе Камил Гәрәев Эльмира Сөләйманованың халык мәхәббәтен яулый алуын әйтте.
«Эльмира Сөләйманова – безнең җимешебез. Ул һәвәскәр җырчыдан зур артист дәрәҗәсенә кадәр үсте. Аны халык яратты. Кайгылы хәбәрне кабул итүе авыр булды», – дип сөйләде ул «Интертат» хәбәрчесенә.
«Казан Экспо» күргәзмә үзәгенең Илһам Шакиров исемендәге концертлар залында «Татар җыры-2023» фестивале бара.
