Эльмира Сөләйманова турында: «Әллә нәрсә шунда, җырлыйсым килми, дигән иде»
Журналист Лилия Йосыпова «Интертат»ка җырчы Эльмира Сөләйманованы бик якын күрүе турында сөйләде. Ул Эльмира белән соңгы тапкыр телефоннан смс язып аралашкан.
Эльмира белән озак еллардан җылы аралашабыз. Газета өчен шактый интервьюлар эшләп калдым. Аңа шалтыратасы гына килеп тора иде. Башта эш буенча гына сөйләшсәк, аннары шалтыратышу, язышуларыбыз ешая барды. Ачык, җылы, рәхәт, шул ук вакытта туры кеше иде. «Мишәрем», «җаным»... – төрлечә якын итеп эндәшә иде. Кыланмый, ясалма түгел. Азга да күңеле була иде аның. Икебез дә әтисез үскән, иркә түгелләр, тормыш, эш, проблемалар турында да сөйләшкәли идек. Кайберәүләргә әйтә алмаган сүзләремне аңа бушанырга оялмый идем мин.
Соңгы вакытларда: «Әллә нәрсә шунда, җырлыйсым, сәхнәгә чыгасым килми әле. Концерт турын беразга туктаттым. Өйдә генә торасым килә», – диде. «Ярар, ял да кирәк. Иҗат кешесе бит син, төрлечә була инде. Бу вакыт үтәр. Артык борчылма. Ирең эшләп тора», – дидем. «Әйе шул», – диде. Аннары: «Тәмле соус белән балык кыздырам. Кил. Казанга самолет җибәримме?» – дип көлде Эльмира. Бүген шушы язышуларыбызны яңадан укыдым да, аның китеп баруына ышанмыйм, – дип сөйләде Лилия.
Эльмира Сөләйманова бүген иртән инфаркттан вафат булды.