Раил Нургалиев федераль Сабан туенда абсолют батыр калды һәм машинага лаек булды
(Казан, 20 июнь, «Татар-информ»). Кичә 19 июнь көнне XXI Федераль Сабантуй кысаларында Нижневартовск шәһәренең «Арена» спорт комплексында милли көрәш буенча Бөтенроссия ярышында Татарстан көрәшчесе Раил Нургалиев абсолют батыр калды һәм төп бүләк — автомобиль иясе булды.
Келәмгә Россиянең ун төбәгеннән алтмыштан артык спортчы чыкты. Алар Татарстан, Башкортстан, Мордовия, Омск, Оренбург, Самара, Төмән өлкәләре, Ханты-Манси автономияле округы — Югра, Пермь крае, Мәскәү шәһәреннән килгән. Бу турыда Бөтендөнья татар конгрессы матбугат хезмәте хәбәр итә.
Спортчылар арасында көрәш буенча гамәлдәге өч чемпион да бар иде.
Чарада Нижневартовск шәһәре башлыгы вазифаларын башкаручы Дмитрий Кощенко, «Нижневартовск шәһәренең «Мирас» татар милли-мәдәни автономиясе» иҗтимагый оешмасы рәисе Рафаил Мөхәммәтҗанов, Бөтенроссия көрәш федерациясе вице-президенты Равил Ногманов, Татарстанның Ханты-Манси автономияле округы — Юграда сәүдә-икътисади вәкиле Булат Бәдретдинов кунак булды.