Баласы булмаганнар салым түли башларга мөмкин
Дәүләт Думасының бюджет һәм салымнар комитеты әгъзасы Евгений Федоров баласызлыкка салым кертергә тәкъдим итә. Аның сүзләрен «Говорит Москва» сайты язып чыкты.
«Советлар Союзындагы кебек, баласызлыкка салым кертү яхшы булыр иде. Балаларның тууын стимуллаштырырга кирәк, шул исәптән ана капиталы аша да. Бу проектлар өчен акча җитмәсә, салым кертергә кирәк», – дигән ул.
Шул ук вакытта депутат аңлатканча, бу концепция эчендә балаларның тууын гына түгел, ә «обрусение» – «руслаштыру» процедурасын, миграция агымнары аркасында халыкны формалаштыруны да аңларга кирәк. «Бу – җәза түгел, бу – проблеманы чишү ысулы», – ди Дума вәкиле.