Ўзбек расмийлари йўловчиларни сарсон қилган Россия авиаширкатига нисбатан санкция қўллашди
“Ўзавиация” агентлиги Россиянинг I FLY Airlines авиаширкатига санкция тариқасида Ўзбекистонга чартер парвозларини амалга оширишни вақтинчалик тўхтатиш тўғрисида қарор қабул қилди. Бу ҳақда Транспорт вазирлиги ахборот хизмати маълумот тарқатди.
Мазкур қарорга I FLY Airlines авиаширкатининг, "Ўзавиация" агентлиги огоҳлантиришларига қарамай, “тегишли рухсатномаларни олмасдан қўпол равишда талабларни бузиб, 2021 йил ноябрь ойида Москва – Урганч – Санкт-Петербург – Урганч – Москва, Навоий – Москва ҳамда Санкт-Петербург – Навоий – Санкт-Петербург йўналишларида чартер парвозлари учун авиачипталар сотувини ташкил этган”и сабаб бўлган.
Россия авиаширкати вакилларининг масъулиятсизлиги туфайли 500 чоғли йўловчи Навоий ва Урганч аэропортларида сарсон бўлгани ҳақида Озодлик аввалроқ хабар қилган.
Транспорт вазирлиги хабарномасида “авиаширкатлар томонидан бундай ҳолатлар такрорланган тақдирда “Ўзавиация” агентлиги парвозларни амалга ошириш учун берилган экплуатация рухсатномаларни бекор қилиши” қайд этилган.
Айни пайтда вазирлик I FLY Airlines авиаширкатининг чартер парвозлари қачондан тикланиши мумкинлигига аниқлик киритган эмас.