Столтенберг: Кина и Русија шират дезинформации за НАТО

Генералниот секретар на НАТО Јенс Столтенберг ги обвини Кина и Русија дека шират дезинформации во врска со одговорот на организацијата на пандемијата на коронавирусот. Тој на видео конференција со РСЕ/РЛ и други медиуми истакна дека и двете земји се обидуваат да ги прикажат НАТО сојузниците како неспособни во заеднички одговор на пандемијата и заштитата на граѓаните, што не е точно затоа што сите земји членки работат заедно.


„Ние имаме неколку пример на изјави кои доаѓаат од Москва и Пекинг, кои што не се точни, со кои се обидуваат да ја поткопаат кохезијата на НАТО сојузниците, при што се портретира Алијансата на погрешен начин“ изјави Столтенберг.


Тој нотира дека министрите за одбрана на земјите членки на Алијансата неодамна решија да ја забрзаат и засилат соработката, затоа што, како што вели, тие ја увидоа вредноста од заедничкиот пристап на сојузниците.


Столтенберг ја истакна и соработката меѓу сојузниците како што се обезбедување на авиони, медицинска поддршка и транспорт на пациенти.


Минатата недела, набљудувачи од ЕУ идентификуваа „трилатерална конвергенција на наративи за дезинформации кои ги промовираат Кина, Иран и Русија за пандемијата на коронавирусот.


Во меѓувреме, заменикот генерален секретар на НАТО Мирчеа Џоана на денешната видео средба со колегите од Европа изјави дека сега не е време да се намалат инвестициите во одбраната.


„Оваа пандемија не направи да исчезнат безбедносните ризици со кои се соочуваат милијарда граѓани“, изјави Џоана.


Тој додаде дека „живееме во свет кој што стана уште понепредвидлив“ и дека во овие тешки месеци на пандемија сојузниците покажаа солидарност.