АКШдагы орус элчилигинин өкүлү Мамдепартаментке чакырылды
АКШнын Мамлекеттик департаменти Орусиянын Кошмо Штаттардагы убактылуу жана ыйгарым укуктуу өкүлү Дмитрий Жирновду чакыртты. Анда Орусиянын АКШнын ички ишине ыктымал кийлигишүүсү боюнча сөз болгонун Мамдепартаменттин өкүлү Хизер Нойерт 5-августта билдирди.
Дипломат билдиргендей, АКШнын тышкы иштер мекемеси “Кремл социалдык сайттар аркылуу АКШда зордук-зомбулукту пайда кылып жана өлкөгө бүлүк салуу аракетин көрүп жатканына” түшүндүрмө алууга ниет кылат.
Буга чейин Вашингтон Москвадан АКШнын ички ишине кийлигишүүнү токтотууну талап кылган. Анын алдында "Фейсбук" социалдык тармагы АКШда ноябрда өтчү Конгресске шайлоону утурлай америкалык коомчулукка "таасир этүү аракети" болуп жатканын жарыялаган.
Москва болсо Орусиянын башка өлкөлөрдүн ишине аралашканын кескин четке кагып келет.
"Фейсбук" компаниясы АКШдагы конгрессмендерди шайлоого жүз күндөн аз убакыт калганда социалдык тармакта "саясий таасир этүү өнөктүгүн" жүргүзгөн 32 жалган баракчаны (аккаунт) аныктаганын билдирди. Компания 31-июлдагы билдирүүсүндө бул баракчаларды түздөн-түз Орусияга байланыштарган жок. Бирок жалган аккаунттар колдонгон ыкмалар орус тараптан деп шектенүүгө негиз берерин белгиледи.