ՀՀ-ում շատ են կանանց շուկան թիրախավորող բարակ ծխախոտի օգտագործողները. Ալ. Բազարչյան
ՀՀ ԱՆ «Ակադեմիկոս Ս. Ավդալբեկյանի անվան առողջապահության ազգային ինստիտուտ»-ի տնօրեն Ալեքսանդր Բազարչյանը կողմ է, որպեսզի Հայաստանում արգելվի բարակ ծխախոտը, որը, ըստ մասնագետների, թիրախավորում է հատկապես կանանց սպառման շուկան:
«Խնդիրն այն է, որ այն խաբեության մեջ է դնում ծխողներին` տպավորություն ստեղծելով, թե դրանք քիչ ավելի վնաս են, քան հաստերը։ Մինչդեռ, ըստ Առողջապահության համաշխարհային կազմակերպության, դա ավելի շատ մարքեթինգային քայլ է՝ շուկա գրավելու համար, և հենց այդ պատճառով դիսկուսիաներ են ընթանում, որ կիրառվեն այս կամ այն սանկցիաները»,-ասաց նա:
Նշենք, որ այսօր հաղորդվել էր, որ Առողջապահության համաշխարհային կազմակերպությունն այս տարի Նյու Դելիում տեղի ունենալիք Ծխախոտի դեմ պայքարի շրջանակային կոնվենցիայի խորհրդաժողովի ժամանակ կարող է որոշում կայացնել բարակ սիգարետներն արգելելու մասին, քանի որ բարակ սիգարետները, ըստ այդմ, իրենց դիզայնով թիրախավորում են հիմնականում ծխող կանանց «շուկան»՝ մատուցելով նաև կեղծ կարծրատիպ, թե ծխելը նպաստում է սլացիկ կազմվածք ունենալուն:
Ալեքսանդր Բազարչյանը նշեց. «Ես հիմա անգիր չեմ հիշում՝ մեր ծխախոտ օգտագործողներից որ մասը ինչ ծխախոտ է ծխում, բայց մեր երկրում բավականին մեծ մասնաբաժին են կազմում բարակ ծխախոտ օգտագործողները»:
Բժիշկը նշեց, որ Հայաստանում որևէ բան կարող է արգելվել միմիայն օրենքով, այդ թվում` ծխախոտի վրա դրվելիք սահմանափակումները, որքան էլ ԱՀԿ-ն կամ որևէ միջազգային կառույց նման խնդիր դնի:
Ի պատասխան հարցի, թե գործի բերումով շա՞տ են եղել դեպքերը, երբ առնչվել է ծխախոտ արտադրող և ներկրող կազմակերպությունների լոբբինգին ու խոչընդոտներին` Ալ. Բազարչյանը նշեց. «Ես ծխախոտային ինդուստրիային վերաբերող հարցերին չեմ պատասխանում»: