Եվրոպայի 2016թ. առաջնության C խմբի առաջին տուրում Գերմանիայի հավաքականը «Պյեր-Մորուա» մարզադաշտում ընդունեց Ուկրաինայի հավաքականին:
Թիմերը շատ ակտիվ սկսեցին հանդիպումը: 5-րդ րոպեին ուկրաինացիների կիսապաշտպան Եվգենի Կոնոպլյանկան կարող էր բացել հանդիպման հաշիվը, սակայն փայլուն գործեց գերմանացի դարպասապահ Մանուել Նոյերը:
Խաղի հաշիվը բացվեց 19-րդ րոպեին: Տոնի Կրոսի տուգանայինի գեղեցիկ իրացումից հետո գլխի հարվածով գնդակը Ուկրաինայի դարպասն ուղարկեց գերմանացիների պաշտպան Շկոդրան Մուստաֆին:
Գոլից հետո Ուկրաինայի ընտրանին մի քանի րոպեում երկու հիանալի պահ ստեղծեց, մի դեպքում գերմանացիներին փրկեց Ջերոմ Բոատենգը, իսկ մյուս դեպքում խաղից դուրս վիճակ էր:
Երկրորդ խաղակեսում հավասար պայքար էր ընթանում: Հանդիպման վերջին րոպեներին փոխարինման դուրս եկած Բաստիան Շվայնտայգերը կարողացավ կրկնապատկել հաշիվը:
Այսպիսով, հանդիպումն ավարտվեց Գերմանիայի ընտրանու հաղթանակով՝ 2:0 հաշվով:
Թիմերը խաղադաշտ էին դուրս եկել հետեւյալ մեկնարկային կազմերով.
Գերմանիա - Նոյեր, Մուստաֆի, Հեկտոր, Հյովեդես, Խեդիրա, Օզիլ, Դրաքսլեր, Մյուլեր, Բոատենգ, Կրոս, Գյոտցե
Ուկրաինա - Պյատով, Խաչերիդի, Ստեպանենկո, Յարմոլենկո, Զոզուլյա, Կովալենկո, Կոնոպլյանկա, Շեւչուկ, Սիդորչուկ, Ֆեդեցկի, Ռակիցկի
Հավելենք, որ վաղը՝ հունիսի 13-ին կկայանան Իսպանիա - Չեխիա (Խումբ D, Երեւանի ժամանակով՝ 17:00-ին), Իռլանդիա - Շվեդիա (Խումբ E, 20:00) եւ Բելգիա - Իտալիա (Խումբ E, 23:00) հանդիպումները:
Գերմանիա - Ուկրաինա՝ 2:0
Գոլերը՝ Մուստաֆի (19), Շվայնշտայգեր (90)