Лениногорск мәктәбенә эт кергән, балаларга ташланган
Лениногорскида питьбультерьер нәселеннән булган кап-кара эт мәктәп эченә кергән һәм балалар өстенә ташланган.
Лениногорск телеграм каналында чыккан видеодан күренгәнчә, ул балаларның өстенә сикерә, уйнамакчы була, кызларны итәкләреннән өстери. Балалар аннан куркып, кычкыра-кычкыра, йөгерә, малайлар этне тотып туктатмакчы да булалар.
Кайбер мәгълүмат чыганаклары балаларны эт тешләгән дип тә яза. Бер баланың, кан басымы күтәреп, хәле киткән.
Мәктәпкә Росгвардия хезмәткәрләре килгән, алар этне урамга чыгарган.
Җирле түрәләр сүзләренчә, эт агрессия күрсәтмәгән, ул балаларны куркыткан гына. Ике балада тырналган эзләр бар.
Этнең хуҗасын тапканнар. Эчке эшләр министрлыгы һәм прокуратура тикшерү башлаган. Мәктәп гадәттәгечә эшли.