Телевизион тапшырулар алып баручы Гөлүсә Сөнгатуллина үзенең иң кадерле Яңа ел бүләген күрсәтте. Ул «Мәдәнияттәге казанышлары өчен» күкрәк билгесе белән бүләкләнгән.
«Мәктәп елларыннан башлап минем мактау кәгазьләрем, дипломнарым бик күп, һәм алар төрле юнәлеш буенча: уку, җыр, бию, йөгерү, чаңгы ярышлары, кул эшләре буенча да җиңү яулаган идем. Алар мине бүгенге көнгә алып килгәннәр икән.
Данлыклы, тарихи Камал театры бинасында әлеге бүләккә ия булу – аеруча да сөенечле! Минем хезмәт юлым башланган кадерле бина бит бу… Театр – минем укытучым! Әлеге бина минем турыда күпне белә, ул – минем якын дустым кебек.
Минем барлык хезмәтләрем мәдәнияткә барып тоташа: театрдагы эшчәнлегем, тапшыруларым, чаралар алып бару, оештыру… Аларда – минем күңелем чагылышы. Алар миңа рәхәтлек бирә.
Рәхмәт, Аллаһы Тәгаләм. Миңа ышанган, янымда булган һәркемгә рәхмәт!» – дип яза Гөлүсә социаль челтәрдәге сәхифәсендә.
