Россия икътисады тарихында бу ел, ихтимал, иң сәер чор булып калыр! Чөнки россиялеләр 2,4 триллион сумны күрәзәчеләргә – оккульт хезмәтләргә сарыф итеп, азык-төлеккә нибары 2 триллион сум гына тоткан. Бу хакта mk.ru хәбәр итә. Хәйран калырлык хәл бит бу! Сихерчеләр, астрологлар, Таро белән фал ачучылар – илнең иң күп табыш китергән профессияләре рәтендә. Хәтта эре банклар да Таро консультацияләре тәкъдим итә башлады. Чыннан да, «ашауны кичектереп тә була инде, иртәгә нәрсә буласын белик».
Тагын бер шомлы фараз: 2025 елда ягулык бәяләре 10-20%ка күтәрелер, дип көтелә. Бу хакта икътисадчы, финанс аналитигы Александр Разуваев NEWS.ru белән әңгәмәдә белдерде. Акцизлар артуы, «Транснефть» тарифлары үсүе, нефть җитештерүчеләрнең бәяләрне контрольдә тотмавы – болар барысы да гаилә бюджетларына тагын да зур басым ясаячак. Машина хуҗаларына икътисадчылар да төгәл киңәш бирә алмый: ягулык бәяләре, ди алар, инфляцияне дә «узып китәргә» мөмкин. Димәк, безне чыгымнарның янә үсүе көтә!
Моңа кадәр чәчәк аткан маникюр индустриясе бүген киеренке чор кичерә шикелле. Бу хакта «Коммерсанть» яза. 2024 елда маникюр хезмәтләре бәяләре 12%ка артса да, ил буенча 350 меңнән артык оста башка өлкәгә күчә башлаган. Ни өчен? Чөнки халык ясалма бизәнүдән туеп, табигый матурлыкка өстенлек бирә башлады. Мода да шундый – аңардан кая китеп булсын?
Ә менә күчемсез милек базарында эшләүчеләр өчен 2024 ел – чын мәгънәсендә «алтын чор». Риэлторлар өчен вакансияләр саны 2,1 тапкырга арткан, күчемсез милек операцияләренең 80%ы нәкъ менә шушы белгечләр ярдәмендә башкарыла. Моны «Авито Недвижимость» һәм «Авито Работа» аналитиклары исәпләп чыгарган. Элек кризис сөйләсәк, бүген – риэлторларның керемнәре турында гына сүз бара. Хәзер бу тармакка кергән һәркем шактый файда күрә.
Күз алдына китерегез: гади курьер кайбер җитештерү тармагы хезмәткәрләреннән дә күбрәк акча эшли! Нигә дисәң, курьерлык эше – ирекле график, югары хезмәт хакы, зур таләп ителүчәнлек. Ләкин моның икенче ягы да бар: кайбер заводларда кадрлар кими, җитештерү тукталырга мөмкин. Шулай итеп, ил икътисады җитди сынауларга дучар булуы бар.
2024 ел санлы революция елы буларак тарихка кереп калыр кебек. Үзәк банк хәбәр иткәнчә, QR-кодлар аша түләү суммасы – 2,6 триллион, биометрия ярдәмендә исә 7,8 миллиард сум түләнгән! Пластик карталар кулланыштан акрынлап читләшә бара: тиздән берәр терминалга йөзеңне якынайтсаң, шул да җитәчәк, диләр. Техник үсешнең көче, чыннан да, гаҗәеп!
2024 елда дропперлар хәрәкәте искитмәле тизлек белән үсә башлады. Үзәк банк исәпләвенчә, илдә 10 миллионга якын кеше акчасын дропперлар исәбенә күчергән. Җинаятьче төркемнәр легаль булмаган керемнәрне рәсмиләштерү, ягъни «акча юу» өчен, акча кабул итеп алучы арадашчылар – дропперларны куя.
Әлеге күренеш илнең финанс иминлегенә куркыныч тудыра, чөнки рәсми исәпкә алынмаган акча хәрәкәте (күләгәле акча әйләнеше) арта. Нәтиҗәдә:
Салымнар кимиячәк: дәүләт казнасында акча җитми, димәк, юллар, мәктәпләр, хастаханәләр төзелеше аксый. Банклар өчен күзәтү кыенлаша: мошенниклык операцияләрен ачыклау авырлаша. Чит ил инвесторлары шикләнә: илнең абруе төшә, инвестицияләр азая. Шулай итеп, икътисадка зур басым барлыкка килә, илнең үсеш потенциалы какшый.
Россия икътисады 4%ка арткан арада, Татарстанның тулаем төбәк продукты 21%ка күтәрелгән! Шәһәр башкарма комитеты җитәкчесе урынбасары Илдар Шакиров китергән мәгълүмат буенча, Казанда уртача хезмәт хакы 89 мең сумнан да артып киткән. Әлбәттә, бу – тагын да күбрәк мөмкинлекләр ача, әмма мондый үсеш фонында инфляция дә чигенми: 2024 елның ноябренә инде 8,83%ка җиткән. Нәтиҗәдә, халыкның чын керемнәре әле һаман басым астында кала.
2024 ел Россия икътисады өчен чын мәгънәсендә борылыш елы булып калачак. Тылсымчылар белән фараз кылу да, бензин бәяләре «янып китү» дә, табигый матурлыкның модага әверелүе дә, кыйммәтле риэлтор хезмәте дә – болар барысы да ил тормышында зур үзгәрешләр барлыгын күрсәтә. QR-кодлар һәм биометрик түләүләр, дропперлар кебек яңа күренешләр икътисадка яңа сынаулар алып килә. Татарстан исә рекордлы үсеш күрсәтсә дә, инфляция тормыш шартларына басым ясавын дәвам итә.
Алда безне тагын да күп вакыйгалар, ачышлар һәм экономик үзгәрешләр көтә. Аллаһ ярдәмендә, төрле сынаулардан курыкмыйча, заман белән бер ритмда атлап, киләчәккә өмет белән карыйк.
