Татар эстрасы җырчысы Илшат Вәлиев социаль челтәрдәге сәхифәсендә «Көт, әнкәй» җырын тәкъдим итте.
Җырның сүзләрен Сания Әхмәтҗанова, ә көен Айдар Тимербаев иҗат иткән.
«Бу җыр концертта барлык тамашачыны елатты. Тамашачы гына түгел, үземнең дә тамакка төер тыгылып, җырлавымнан чак туктап калмадым. Ә видеосы – иҗади клип түгел, ә бары тик интернет челтәреннән алынган гади кеше язмышлары. Барысы да тормыштан, бүгенге дөнья хәлләреннән. Кем уйлаган шушындый гади, бер таныш булмаган кешеләрнең кайгысы барыбызга да шундый уртак һәм ихлас булыр дип?!
Д.Донскойның «Замысел» дигән киносында шундый сүзләр бар: «Ни өчен сугышлар кирәкме? Шул сугышларны гасырлар саен ясап тормасак, сез рәхәтлекнең кадерен белмичә, бер-берегезне ашый башлаячаксыз. Сугыш – сезне бер-берегезгә якынайтучы һәм бер-берегезгә ярдәм кулы сузарга этәрүче бердәнбер корал, башкасы уйланып табылганчы»...
Чыннан да без шундыйрак түгел микән? Китереп бер «сукмыйча» аңламыйбыз шикелле», – дип язган җырчы.
Көн кадагындагы темага язылган җыр күпләрнең күңеленә тигән, йөрәк ярасын кузгаткан.
