Юмор остасы, алып баручы Рамил Шәрапов актуаль темаларны вакытында эләктереп алып видео да төшереп куя. Әле генә ул балаларны мәктәпкә әзерләгән ата-аналарның «ыштансыз» калуын уены-чыны белән халыкка җиткерсә, хәзер инде 1 сентябрьгә укытучыга «букет» ясаган.
Видеода күренгәнчә, артист ташкабакка 3 татлы борыч беркеткән, яулыкка төргән һәм бер баласының укытучысына бүләге әзер! Алар хатыны белән шул уңайдан видео да төшергән.
– Нәрсә ул кулыңда?
– Нәрсә ул? Букет!
– Кабачкиданмы?
– Күрмисеңме әллә? Кабачки бит. Быел бәрәңге булмады.
– Ә чәчәк кая?
– Син чәчәкләрнең бәяләрен күрдеңме? «КамАЗ» алырга була. Ә өйдә кабачкидан күбе юк, кая куеп бетерәсең син аны? Нормаль букет.
«Хөрмәтле укытучылар,
Бездән сезгә кабачки белән борыч,
Уку елыгыз узсын тыныч.
Әти-әнигә – сабырлык.
Укырга әзерме сез, халык?
Мин инде – гарык!
Тагын бер кабачки алып кил, ике укытучыга ясарга кирәк бит», – ди артист.
Шул вакытта Шәрапҗан образындагы артист егыла һәм букет та «әрәм» була.
