Фирдүс Тямаев төркемендә эшләүче шагыйрь Рүзәл Минһаҗевның туган авылы – Мөслим районы Метрәй авылында бүген кайгы көне. Аларның авылдашлары, әбисенә кунакка кайткан кечкенә Әминә, бәхетсезлеккә очрап, һәлак булган. Бу хакта Рүзәл Минһаҗев мессенджерларда язды.
«Халкым, бүген авылыбызда бик авыр көн. 12 яшьлек сабыебызны, авылыбызның кунагын җирлибез. Гаиләдә бердәнбер бала, 6нчы сыйныфка барасы иде. Әти-әнисенең авыр кайгысын уртаклашабыз, бала кайгысыннан да авыр әйбер юк.
Тормыш – мизгел. Гомерләр бик кыска, дуслар. Ничек язылган бит. Шушы гомер эчендә дә күпме сагыш, кайгы-хәсрәт. Ашыгып, күп әйбер югалтабыз. Аралашырга, күршенең хәлен белергә, туганга кунакка барырга онытабыз…» – дигән ул.
