Хәмдүнә Тимергалиеваның якты истәлегенә багышлап, «Туган тел» телеканалындагы «Сер итеп кенә» тапшыруын алып баручы Роза Хәйруллина легенда белән аралашудан бер өзек куйган.
«Сез чынбарлыкта нинди кеше? Сезне усал да диләр, турыга бәреп, «манчып» әйтә, диләр?» – дип сорау бирә алып баручы Хәмдүнә Тимергалиевага.
«Турыга бәреп әйтү – ул усаллык түгел, үзеңне яклау. Икейөзләнеп йөрсәң, кеше дә хөрмәт итми, үзеңне үзең дә хөрмәт итмисең. Бар дөньяда шундый кешеләр, күзеңә карап елмаеп, астан кисәләр, сорыкортлар. Астан кабәхәтлек эшләгәнче, акыруың яхшырак», – дип җавап бирә җырчы.
Әлеге видео янында Роза Хәйруллина Әнгам Атнабаевның «Талантларның язмышлары авыр» шигырен дә язып калдырган.
«Талантларның язмышлары авыр –
Чөнки алар гайре табигый,
Дөнья балалары арасында
Я дивана сыман, я үги.
Туры булсан, нигә кәкре, диләр,
Кыек булсаң, нигә төз түгел,
Нигә инде мөгез чыгарасың,
Нигә безнең кебек без түгел?
Талантларның күңелләре нечкә,
Сындырып та була кимереп,
Сыйдырып та була, бүгенгенең
Калыбына туры китереп...
Ахыр чиктә, үтереп тә була...
Тик терелтеп булмый кабаттан...
Талатларга, зинһар, кагылмагыз,
Үзләренчә булсын талантлар!»
