Хабаровск шәһәрендә яшәүче хатын яңа туган кызын үтерергә маташкан, 11 айлык улына роллы ашаткан. Аны хөкем иткәннәр. Бу турыда «Комсомольская правда» яза.
28 яшьлек А. үзе ятим үскән. Балалар йортыннан соң ул урамда калган, аңа бүлеп бирелгән торак белән ни булганы билгесез. Тулай торакларда, арендаланган фатирларда яши, торак өчен түләми.
Аннары А. чибәр егеткә гашыйк була, 2019 елда аннан малай таба. Ләкин гаилә корып булмый – егет өйләнгән булып чыга. Ул чит илгә китеп бара.
Малай җитлегеп туа, ләкин ябык була. Хастаханәдән чыкканда, аңа махсус диета билгелиләр. Тикшерү фикеренчә, 11 айлык малайга ашау җитмәгән. Анасы аны махсус тукландыруга акча таба алмый, ә чипсы белән роллыга акча табыла. Анасы баланы табибларга да алып бармый, педиатрларны өйгә дә кертми. 11 ай тулгач, ул баласын балалар йортына бирә, сәбәбе – бала тапканда улын калдырырга урын булмау. Аннары А. улын алырга килми инде.
2021 елда А. икенче баласын – кызын тудыра, ул башка ирдән, хәзер колониядә утыра. Кызга да тәмуг әзерләнгән. Туганда аның да авырлыгы җитми. 1,5 ай аны хастаханәдә дәвалыйлар, анасы биредә калмый, туганнан соң 46 атна узгач, баланы хастаханәдән чыгаралар. 1 ай 22 көндә әнисе белән яшәгәндә кыз скелетка әверелә. Анасы аңа кибеттән алынган сыер сөтенә су кушып ашата. Анысы да гел эләкми. Тикшерүчеләр ачыклаганча, ана кеше 3 айлык баланы өйдә ялгызын калдырып чыгып китә, табибларга күрсәтми. Бала ябыгып бетә, әле, өстәвенә, битенә йодрык белән дә сукканнар.
Могҗиза белән генә әлеге фатирга эләккән педиатр чаң суга – «ашыгыч ярдәм» чакыра. Сабыйны хастаханәгә алып китәләр.
Җинаять эше ачыла. Тикшерүчеләр, хатын баласын үтерергә маташкан, дип саный. Аннары А. баласын кыйнавын таный. Сабый кычкырган, телефоннан кино карарга комачаулаган. «Мин ул үзе үлсен дип теләдем», – дип аңлата ул ашатмавын.
Судта бу хатын улына пюре ашатуын, роллы бирмәвен исбатларга маташа. Кызына да сыер сөтеннән соң смесьләр биргәнен әйтә, тик бала аны ашамаган. Ә кызның тәнендә кара янган урыннар – диваннан егылып батареяга бәрелү аркасында гына чыккан.
Суд А.ны 10 елга ирегеннән мәхрүм иткән, диелә хәбәрдә.
