Хокук саклау органнары хезмәткәрләренә һөҗүм иткән Җәлил Гатауллин Татарстан Югары суды каршына басты. Әмма аңа «гаепләнүче» статусы бирелмәгән: ир-ат «үз акылында түгел» дип танылган. Медицина экспертизасы ир-атта психик тайпылыш булуын раслаган. Суд аны мәҗбүри психиатрик дәвалануга җибәрү турындагы карарны карарга тиеш иде.
Җәлил Гатауллинга 24 яшь, ул Түбән Камада яши. Күпмедер вакыт ул «Эластик» заводында эшләгән. Элегрәк аны наркотиклар кулланган өчен административ җаваплылыкка тартканнар. 2023 елдан Җәлил психиатрда исәптә тора.
Элегрәк «Татар-информ» хәбәр иткәнчә, агымдагы елның февраль башында Түбән Камада 2 полицейскийга һөҗүм иткән ир-атны тоткарлыйлар. Эчке эшләр министрлыгы бинасы янындагы автостоянкада Җәлил Гатауллин 2 полиция хезмәткәренә һөҗүм иткән һәм аларга берничә тапкыр пычак белән кадаган. Аны әлеге вакыйга шаһитләре булган яраланган полицейскийларның хезмәттәшләре тота.
Ул вакытта зыян күргән полиция хезмәткәрләрен авыр хәлдә хастаханәгә алып китәләр. Бәхеткә, алар икесе дә исән кала.
«Җәлил Гатауллин, психик тайпылыш тәэсирендә, үз гамәлләренең нәрсәгә китерүен аңламыйча, җәмгыять өчен куркыныч гамәл кылган. 2024 елның 1 февралендә Гатауллин участок уполномоченные Никаноровка арткы яктан якын килеп, пычак чыгара һәм аның уң як күкрәк читлеге өлкәсенә кадый. Көрәш башлана, һәм Гатауллин сул җилкә өлкәсенә тагын бер пычак җәрәхәте ясый», » дип сөйләде ул көн вакыйгаларының хронологиясен ТР Прокуратурасының җинаять-суд идарәсенең Дәүләт гаепләүчеләре бүлеге прокуроры Линара Чуркина.
Фото: © «Татар-информ», Дмитрий Шатров
Янәшәдә булган башка полицейскийлар Гатауллинны туктатырга телиләр. Еремин һәм Сатдиков Җәлил Гатауллинны тотып торырга тырыша, ләкин ул уң кулын ычкындыра һәм пычак белән Сатдиковка кадый. Полицейский борылып өлгерә һәм тырналган җәрәхәтләр белән котылып кала.
Шуннан соң Җәлил Гатауллин куллардан ычкына һәм Ереминга пычак белән кадый. Еремин үз-үзен саклап кала, шулай да сул күзенә кан савып, тырналу эзләре кала. Бу вакытта эчке эшләр министрлыгы бинасыннан тагын бер полиция хезмәткәре – Хәкимов чыга. Ул йөгереп килеп, Гатауллинны аякларыннан тартып ала, аның белән бергә егыла. Һөҗүм итүче Хәкимовның ботына, күкрәгенә пычак белән кадый. Шул вакыт Сатдиков белән Еремин йөгереп килеп, Гатауллинны киемнәреннән тартып алалар һәм бәйлиләр.
Нәтиҗәдә, Никаноровның үпкәсе тишелгән була, аның сәламәтлегенә килгән зыян авыр дип бәяләнә. Хәкимов бил җәрәхәте ала, талак, ашказаны асты бизе һәм бавыры зыян күргән була. Еремин белән Сатдиков тырналу җәрәхәтләре белән котыла.
Җәлил Гатауллин судка үзенең гаебен тулысынча тануын һәм кылган гамәлләре өчен үкенүен әйтте.
Утырыш барышында Җәлил Гатауллинга психоневрология диспансерында калу вакытын озайту мәсьәләсе килеп басты. Ләкин ул судка көтелмәгән үтенеч белән мөрәҗәгать итте.
«Мине СИЗОга күчерергә мөмкин булсын өчен кабат медицина экспертизасы үткәрүегезне сорыйм», – диде Гатауллин.
Судья медицина комиссиясенең бәяләмәсен укыды, аның нигезендә ир-ат үзе өчен дә, тирә-юньдәгеләр өчен дә куркыныч тудыра. Дәүләт гаепләүчесе, Гатауллинның адвокат һәм аның законлы вәкиле булган әнисе уртак фикергә киләләр: Җәлилгә дәвалануын дәвам итәргә һәм табиблар күзәтүе астында калырга кирәк. Җәлил Гатуллин исә СИЗОга күчерүне таләп итә, чөнки медицина учреждениесендә, аның сүзләренчә, ул намаз укый алмый.
Фото: © «Татар-информ», Дмитрий Шатров
«Анда моның өчен шартлар юк, мин палатадагы башка кешеләргә комачаулаячакмын. Ә минем өчен бу – мөһим. Мине СИЗОга җибәрүегезне сорыйм. Җибәрегез мине һәм «үз акылымда» дип таныгыз», – дип сорый ул.
Суд сүзне Гатауллинның әнисенә бирә. Судья әйтүенчә, аның позициясе улының позициясен белдерми, чөнки аны судта адвокат тәкъдим итә.
«Бәлки, ул хастаханәдә үзенең гомеренә куркыныч янавын сизәдер. Узган судларда ул миңа хәтта карамады да, реакциясе юк иде. Ә хәзер миңа карап утыра, аның зиһене ачылган кебек. Элек ул сөйләүдән баш тарта һәм җаваплар өчен адвокат аша язулар тапшыра иде. Бүген ул башка, аралаша, бәлки, бу дәвалану аңа шулай йогынты ясагандыр. Мин улымны һәрвакыт хупладым, ләкин аны хастаханәдә калдыру яхшырак булыр дип уйлыйм», – диде хатын.
Кайсыдыр бер мизгелдә ир-атның әнисе елап җибәрә: «Дәваларга кирәк, мин аның җәмгыятькә кайтуын телим. Мин аның шәхес буларак югалуын күрдем».
Судья Җәлил Гатауллинны психиатрия хастаханәсендә тагын ярты елга калдыру карарын кабул итте.
«Татар-информ»нан тәрҗемә. Авторы: Дмитрий Шатров
