Петербургта аю хуҗасын ботарлап ташлаган да качкан. Бу хатын аюны бакча участогында асраган. Аюдан тагын зыян күрүчеләр бар. Бу турыда РЕН ТВ хәбәр итте.
Фаҗига Выборг районындагы «Гидроникель» бакчачылык ширкәтендә була. Биредә яшәүче хатын ике аю асрый. Ерткычларның берсе хуҗабикәгә каршы котыра һәм хатынны ботарлый, аннары аю участоктан чыгып кача.
Хәзер аюны полиция хезмәткәрләре һәм мылтыклы урманчылар эзли. Зыян күрүчеләр саны ачыклана, диелә хәбәрдә.
«Вести» каналы белешмәсе буенча, аюлар циркныкы була, хатынны ике аю бергә ботарлый. Бу турыда бакчачылык ширкәте башлыгы Алексей Иванов сөйләгән. Хәзер бирегә аюларның хуҗасы килә. Аннары махсус хезмәтләр килеп, аюларны йоклатып үтерәчәк.
Телеграм-каналлар бер аю гына булган, ул читлектән чыгып, хуҗабикәсен ботарлаган да чыгып качкан, дип яза. Бакчачылык ширкәте чатында исә ике аю да чыгып качкан, диләр. Хәзер тирә-якта ату тавышлары ишетелә, урынга килгән полиция һәм махсус хезмәтләр ерткычларны тотарга маташа, диелә хәбәрдә.