«Теплицага үсентеләрне әле күчерергә ашыкмыйм. Әле тагын киләчәк кырауларның узуын, туфракның җылынуын көтәм. Июньнең беренче яртысында утырта башлармын, – ди Чаллы янындагы «Бережок» СНТ бакчачысы Татьяна Блохина. – Туклыклы катнашма әзерләү мөһим, мин аны үсенте күчергән вакытта чокырларга салам. Кышы буе җыелган йомырка кабыгын блендерда ваклыйм. Аннары шуны вермикулит һәм агроперлит, торф һәм биогумус белән болгатам. Боларның барысы да бакчачылар кибетләрендә бар. Бу катнашмага көл дә салам».
Мондый катнашма помидор, борыч, баклажан, кыяр һәм башка культуралар утырту өчен килешә.
«Сезон дәвамында үсентеләрне сыек ат тизәге белән тукландырам. Пакетында язылган күрсәтмә буенча эш итәргә кирәк. Шулай ук бик яхшы ашлама – кычыткан: су тутырылган бочкага вакланган кычыткан салырга, аны бер атна тотарга, тамырларга ун литр суга бер литр катнашма исәбеннән ясалган эремә итеп сибәргә», – дип уртаклашкан «Челнинские известия»га тәҗрибәле бакчачы.
