«Болгар» радиосы алып баручысы, журналист Дилбәр Фәиз аның телефон номерыннан татарча смс язып акча сораган мошенникларга гариза язган.
Дилбәр Фәиз мошенниклар белән булган хәлне «Интертат»ка сөйләгән иде.
Мошенниклар Дилбәрнең телефон номерын кулга төшереп, ягъни аккаунтын ватып керә. Аннары аның исеменнән 50 мең сум акча сорап, таныш-белешләренә саф татарча смслар язып чыкканнар. Смслар татарча булу сәбәпле, бу хәбәргә Дилбәрнең күп кенә танышлары ышанган.
«Менә эш юклыктан эш барлыкка килеп тора бит. Мин кайда йөрим дип уйласагыз, килеп җиттем мин, мошенникларга гариза яздым. Булды. Мошенниклар, держитесь, езнең эш тикшерелә. Бүген көләм, кичә бер дә көләсе килми иде, дуслар», – дип сөйли ул социаль челтәрдә урнаштырган сториста. Ул бу видеоны Россиянең Эчке эшләр министрлыгының Казан буенча идарәсе ишек төбендә яздырган.
