Быел февраль аенда булган юл һәлакәте 24 яшьлек Эвелина Фәйзуллинаның тормышын үзгәртә. Бер төн эчендә ул әти-әнисен югалта, шулай ук аның җилкәсенә 16 яшьлек сеңлесен кайгырту да төшә.
– 4 февраль минем һәм барлык якыннарым өчен мәңгегә кара көн булып калды. Юл-транспорт һәлакәтенә 1 көн кала әти-әнием сеңлем белән Башкортстанга әбине авылга илтергә китәләр. Икенче көнне, Чаллыга кайтканда, машина тәгәрмәче чокырга эләгә. Машина әйләнеп борыла һәм фура астына оча. Әти-әни шунда ук үлә. Сеңлем могҗиза белән исән кала, – дип сөйли Эвелина.
Ул күз яшьләрен тыя алмый. Чөнки аның әнисе Альбина Хановага 42 яшь кенә, ә әтисе Марс Хановка 47 яшь була.
– Әнием корылма заводында эшләде, әтием төньякка акча эшләргә йөрде. Алар бик ачык, ярдәмчел кешеләр иде. Беркайчан да башкаларның бәласе яныннан ярдәм итмичә үтеп китмәделәр. Буш вакытларында әти машина белән мавыга иде. Әни буш булганда, безнең янга килә иде. 2022 елда мин кияүгә чыктым, ирем белән ипотека алдык, күчендек, улыбыз туды – хәзер аңа 1 яшь тә 4 ай. Әни бала карашырга булыша иде, – ди ул.
Юл-транспорт һәлакәтендә зыян күргән 16 яшьлек сеңлесе турында кайгырту Эвелинаның җилкәсенә төшә.
Ул авариядә Азалинаның умыртка баганасы, умрау сөяге, оча сөяге сынган – хәтта буыны икегә ярылган һәм яңагы 3 урында ярылган. Сеңлесенә карарлык булмаган, җәрәхәтсез урыны да калмаган иде, дип сөйли Эвелина.
Башта Азалинаны БСМПга алып киләләр, аннары ДРКБга алып китәләр, анда ул 2 атна реанимациядә ята, 4 операция кичерә. Хирурглар кызны өлешләп җыялар. Аның бил буыннарына Илизаров аппаратын куялар. 15 апрель көнне Азалина табибка күренәчәк, аппарат ярдәм иткәнме, юкмы икәне билгеле була. Әгәр нәтиҗә тискәре булса, имплант куярга туры киләчәк, ә бу инде – күп акча, дип борчыла Эвелина. Әгәр табибларны Азалинаның хәлен канәгатьләнерлек дип тапса, ул ким дигәндә утыра алачак, ди сеңлесе.
Эвелина сеңлесен тәрбияләү турында документларны рәсмиләштергән, аны өйдә укытуга күчергән.
– Ул бик яхшы укыды, барлык фәннәрдән диярлек «бишле» иде. Инглиз телен өйрәнә, юрист булырга хыяллана иде. Аның планнары тормышка ашмас дип әйтеп булмый. Әмма реабилитация озакка сузылачак, һәм ул әле тиз генә мәктәпкә йөри алмаячак, – дип билгеләп үтә Эвелина.
Эвелина сүзләренчә, Азалина әти-әнисе үлемен авыр кичерә. Бу хакта аңа Казан хастаханәсендә әйтәләр. Хәзер яшүсмер фаҗиганең тирәнлеген аңлый башлады, һәм вакыт-вакыт аны өметсезлек каплап ала, кайвакыт тыныч кына елый, кайвакыт үкереп елый. Кайвакыт ул әнисе белән аралашу мизгелләрен искә төшерә һәм хәтта елмаеп куя. Ләкин аннан аның хәле тагын начарлана.
Бәла ялгызы гына килми, дип юкка гына әйтмиләр. Әти-әнисе үлгәннән соң 40нчы көнне әбиләре дә вафат була. Хәле начарланган 70 яшьлек хатынны туган авылыннан хастаханәгә алып китәләр, аннан ул инде кире кайтмый. Кызлар тулысынча ятим калалар.
24 яшьлек Эвелина сеңлесен кашыктан ашата, ризыкны алдан изә, дарулар бирә, бинтларын алыштыра, «пролежнилар» барлыкка килмәсен өчен уа, башка гигиена процедуралары үткәрә, аның эмоциональ халәтен контрольдә тота.
Эвелина бу хәлне берүзе генә җиңеп чыга алмаячагын таный. Бу хәлдән соң аңа туганнары, күршеләре, дуслары, әти-әнисенең хезмәттәшләре ярдәм кулы суза.
– Без нинди ярдәмчел кешеләр арасында яшәгәнебезне дә белми идем. Бөтен йорт безгә ярдәмгә килде. Әниемнең һәм әтиемнең хезмәттәшләре күп мәшәкатьләрне үз өстенә алды. Һәрвакыт ярдәм кулы сузучылар бар, – ди Эвелина.
Азалинаны ДРКБга яңагына операцияга алып барыр вакыт җиткәч, 40нчы комплексның ТОС рәисе Маргарита Чибилева БСМПның баш табибы Марат Мөхәммәдиевка мәктәп укучысын Казанга махсус транспортта алып китүләрен сорап мөрәҗәгать итә. Техника бирелә. Хәзер кыз сыек ризык кына ашамый. Тиздән тагын бер сәяхәт булачак.
Эвелина битараф булмаган кешеләргә рәхмәт әйтә һәм аларның ярдәмен күп тапкырлар тоячагына өметләнә.
– Азалинаның аякка басуын бик телибез, – ди Маргарита Чибилева. –- Рамазан ае үтте. Православие динендәгеләрнең бөек посты бара. Мондый көннәрдә мохтаҗ, авыру кешеләргә ярдәм итү – гадәти хәл. Без, күршеләр, читтә калмыйбыз һәм Чаллы халкын Азалина белән Эвелинга ярдәм итәргә чакырабыз. Кызлар бик тыйнак, ярдәм алырга оялалар. Ләкин без ярдәм итмичә, аларга кем ярдәм итәр?
Кызларга ярдәм күрсәтергә теләүчеләр +7 965 615-12-69 телефоны буенча 40нчы комплексның ТОСына мөрәҗәгать итәргә мөмкин.
«Челнинские известия»дан Эльвира Мөхәммәтдинова язмасы тәрҗемә ителде
