Башкортстанның Күмертау шәһәрендә шәхси оешмада эшләүче ир-ат талпан тешләгәч үлгән. Ул өченче төркем инвалид булган. Бу турыда «Башинформ» хәбәр итте.
Фаҗига 2023 елның җәендә була. Ир-ат вахта ысулы белән эшли, эшкә баргач, аны талпан тешли. Ул гаиләдә бердәнбер туендыручы була. Якыннары судка мөрәҗәгать итә, алар мораль компенсация сорый. Суд мәрхүмнең атасына һәм анасына 850 шәр мең, апасына 450 мең сум түләү турында карар чыгара. Суд карары әлегә үз көченә кермәгән.
«Суд карары буенча, әлеге эшче шәхси саклану чаралары, шул исәптән энцефалитка каршы костюм булмау сәбәпле үлгән. Эш бирүче мәрхүмнең гаиләсе белән элемтәгә чыкмаган, мәсьәләне судка кадәр хәл итү белән кызыксынмаган. Компания җирләү өчен матди ярдәм тәкъдим итмәгән, гаиләгә 1 тиен дә бирмәгәннәр», – дип сөйләгән хокук яклаучылар.
