Башкортстанның Стәрлематак шәһәрендә яшәүче 23 яшьлек егет наркотиклар куллангач, атасына 35 тапкыр пычак кадап үтергән, аннары үзенең колагын өзгән. Бу турыда «Башинформ» хәбәр итте.
«Честно говоря» телеграм-каналы белешмәсе буенча, бу – тәртипле гаилә булган. Ләкин уллары тыелган матдәләр куллана башлаган. Наркотикка акча табу өчен, урлауга керешкән. Борчуга калган ата-ана улын өйдә бикләп куя башлый, беркая да чыгармыйлар.
Бер көнне әти кеше улын тагын урамга чыгармый. Егет аш-су пычагы ала һәм атасына 35 тапкыр суга. Яраланган ир-ат урында ук үлә.
Атасын үтергән егетне тоткарлыйлар, тикшерү изоляторына озаталар. Рәшәткә артында анда паника башлана: егет башын рәшәткәләр арасына тыга, аннары колагын өзеп ала. Табиблар колакны кире тегеп куя алган. Берничә көн узгач әлеге вакыйга кабатлана: бу юлы егет ике колагын да өзә.
Тикшерү эшләре бара, диелә хәбәрдә.
