Чаллы халкы арасында 5 февраль көнне уку йортларына һөҗүм булачагы турында ялган мәгълүмат тарала башлаган. «Челнинские известия» язуынча, бу хәбәрләрдә мәктәпләр исемлеге дә бар. Хәбәрләрне, имеш, корал белән килергә җыенган кеше җибәргән.
Шәһәрнең Мәгълүмати сәясәт һәм җәмәгатьчелек белән элемтә идарәсендә хәбәр итүләренчә, бу мәгълүмат чынбарлыкка туры килми.
«Бу – ялган! Тынычлык саклауны һәм паникага бирелмәвегезне сорыйбыз. Бу мәсьәлә хокук саклау органнары контролендә. Хәзер әлеге хәбәрне җибәрүдә катнашы булган кешеләрне билгеләү һәм җаваплылыкка тарту буенча оператив-эзләү чаралары комплексы үткәрелә. Җинаять эше кузгату мәсьәләсе хәл ителә. Кирәк булганда, уку йортларының иминлеген тәэмин итүнең барлык кирәкле чаралары көчәйтеләчәк», – дип хәбәр иттеләр Чаллы шәһәре администрациясендә.
