Çумăр çукаласа тăни ĕçлеме чарать. Апла пулин те республикăра миллион та 3 пин тонна яхăн ылтăн пĕрчĕ пӳлмене кĕнĕ е сутлăха кайнă. 30 çул каялла Чăваш Енре тĕш тырă пухса илессипе рекорд пулнă. Ун чухне миллион та 4 пин тонна пĕрчĕллĕ культура çапса илнĕ. Хальлĕхе вырмана 99,3 процент вĕçленĕ. Çавна май республикăри хуçалăхсен 1992-мĕш çулта лартнă рекорда çĕнетме шанăç пур.
Чăваш Республикин ял хуçалăх министерствинчен пĕлтернĕ тăрăх, Улатăр, Патăрьел, Йĕпреç, Канаш, Куславкка, Муркаш, Вăрмар, Шупашкар, Елчĕк районĕсенче вырма вĕçленнĕ. Хĕрлĕ Чутай, Çĕрпӳ, Сĕнтĕрвăрри районĕсенче ĕçлемелĕх пур-ха. Тухăç савăнтарать, гектартан вăтамран 33 центнер ытла тухса пырать. Елчĕк, Çĕрпӳ, Куславкка, Канаш, Патăрьел, Улатăр районĕсенче тухăç республикăри вăтам кăтартуран та пысăкрах. Тăватă районта куккурус вăррине пухма пуçланă. Ку ĕç пĕлтĕрхинчен каярах юлса пырать. Иртнĕ çул çак кун тĕлне 1088 гектар çинче вăрлăх тĕшĕленĕ пулсан, кăçалхи кăтарту 92-пе çеç танлашать. Тухăç та пĕлтĕрхинчен пĕчĕкрех – гектартан 55 центнер тухса пырать.
17 районта уй патшине выльăх апачĕ валли хатĕрлеççĕ. 10 000 ытла гектар çинчен куккуруса çулнă та. Комсомольски тата Шупашкар районĕсенче ĕçе кĕртнĕ лаптăк пин гектартан та иртет. Хуçалăхсенче çĕрулми те кăлараççĕ. Лартнин 70 процентне пуçтарса илнĕ. Улатăр, Йĕпреç, Канаш, Пăрачкав районĕсенче «иккĕмĕш çăкăра» кăларса пĕтернĕ. Элĕкпе Сĕнтĕрвăрри районĕсенче вара ĕçе 20 процент çеç пурнăçланă. Хальлĕхе республикăра 99 пин ытла тонна серулми пӳлмене кĕнĕ.