Краснодар краеның Ейск шәһәрендә Су-34 хәрби самолеты һәлакәткә очраган. Ул торак йорт янына төшкән. Бу турыда «Вести» каналы хәбәр итте.
Социаль челтәрләрдә таралган фотолар һәм видеоларда янгынның торак йортка күчүе күренә, берничә кат яна, диелә бу хәбәрдә.
Әлеге фаҗига турында ТАСС агентлыгы шаһитларга сылтама белән хәбәр итте.
Видеоларда күп катлы йорт януы күренә, дип яза «Татар-информ».
РИА Новости Саклану министрлыгына сылтама белән хәбәр иткәнчә, тавыш тизлегеннән югары тизлектә оча торган истребитель-бомбардировщик Су-34 пилотлары катапультаны кулланырга өлгергән.
«Бүген Көньяк хәрби округының хәрби аэродромында уку-тренировка очышы ясаганда биеклеккә күтәрелгәндә Су-34 самолеты һәлакәткә очрый. Самолет Ейск шәһәре эчендә төшә», диелә бу хәбәрдә.
Исән калган очучылар доклады буенча, самолет бер двигателенә ут кабу сәбәпле һәлакәткә очраган, дип ачыклык керткәннәр Саклану министрлыгында.
Ведомство белешмәсе буенча, торак кварталларның берсенең ишегалдында Су-34 төшкән урында авиаягулыкка ут капкан.
Краснодар крае губернаторы Вениамин Кондратьев телеграм-каналында хәбәр иткәнчә, ул Ейск районына барган. Урында экстрен хезмәтләр эшли.
«Вести» каналы белешмәсе буенча, фаҗига Коммунистик урамында була. Бирегә бөтен шәһәрдән ашыгыч ярдәм һәм янгын сүндерү машиналары килә, күктә вертолетлар очып йөри. Шаһитлар беренчедән тугызынчы катка кадәр януы турында сөйли, диелә хәбәрдә.
Соңрак РИА Новости йортның биш каты януын хәбәр итте.
