«Интертат»та Яшел Үзән районы Карауҗа авылы егете Рөстәм Шакиров турында «Туберкулезлы егет, мобилизацияләнеп, «Казан Экспо»да ята: «Битлек аша сула, диделәр» дигән язма чыккан иде. Туберкулез белән авырып, бер елга якын хастаханәдә яткан егетнең мобилизацияләнүе турында ул. Диспансердан ялга өенә кайткан Рөстәмне якшәмбе көнне мобилизацияләп, чирен аңлатырга вакыт та калдырмыйча, «Казан Экспо»га алып китәләр. Анда Рөстәмнең хәле катлаулана бара, чөнки сәламәтлегенә казарма шартлары килешми. Физик йөкләмәләр дә, солдатларча туклану да, дымлы һава да ярамый аңа.
Кичә, 5 октябрьдә Рөстәм Шакиров РКБда медкомиссия үтүе турында хәбәр иткән иде. Диагнозы расланып, бүген аны хәрби хезмәттән азат иттеләр һәм өенә кайтарып җибәрделәр. «Теләктәшлек күрсәткән бар кешегә дә рәхмәт. Үзегез дә исән-сау булыгыз», - диде Рөстәм, хәлен белешергә шалтыраткач.
Тиздән Рөстәм дәвалануын Яшел Үзән туберкулез диспансерында дәвам итәчәк.
