Танылган теле-радио тапшырулар алып баручы, диктор Идел Кыямов зур шатлыгы белән уртаклашты. Ул, ниһаять, дипломлы журналист булган.
«Аллаһка шөкер, дипломны тапшырдылар. Хәзер эстрада артисты, укытучы һөнәрләрем исемлегенә югары белемле журналист дигәне дә өстәлде.
Биш ел уку дәверендә ниләр генә булмады. Мәсәлән, төркемдәшем Энҗе ике тапкыр бәби табарга җитеште. Ә үзе кипарис кебек, сөбханалла.
Менә бу фотодагы кебек вакытлар да булды. Ярдәм иткән, терәк булган барлык кешеләргә зур рәхмәт.
КФУ Журналистика һәм медиакоммуникацияләр югары мәктәбе директоры Леонид Толчинскийның диплом тапшырганда мине «республика тавышы» дип атавы аеруча сөендерде», - дип язган ул.
Барлык дуслары да Иделгә дипломының рәхәтен күреп, алда тагын да зуррак үрләр яулавын теләгән. Бер төркемдәше аеруча нык ярдәм иткән күрәсең, үзенә аерым рәхмәт белдермәгәнгә Иделгә нык үпкәләгән. «Отписываюсь» дип тә куркыткан. Журналист Алинә Айдарова төркемдәшен «Татар-информ» мәгълүмат агентлыгына эшкә чакырып калган, үзен онытмаска кушкан. «Онытырсың сине», - дип елмайган Идел.
Фото: © Идел Кыямовның социаль челтәрдәге сәхифәсеннән
Идел Кыямов: «Аллаһ бирә – хатын ала!»
