Къилбаседа Кавказан ялх республика белхазаллин рейтингехь тIаьххьарчу меттигашкахь нисъелла
Оьрсийчоьнан регионашкахь белхазаллин рейтингехь тIаьххьара меттигаш кхаьчна Къилбаседан Кавказера ялх республикана. 2021-чу шеран тIаьххьарчу куьпера статистка ялайо РИА Новости хьостано.
Рейтингехь тIаьххьара 85-гIа меттиг кхаьчна ГIалгIайчоьнна – цигара белхазалла 30% хьалакхаьчна. Чакхенехьара шолгIаниг ю Дагестан 12,1% белхазаллица. Нохчийчоьнна 82-гIа меттиг кхаьчна – цигахь болх бац 10,9% бахархойн, Кхарачойн-Чергазийчоьнна 79-гIа меттиг кхаьчна - 10,1%, ГIебартойн-Балкхаройчоь 78-гIа меттиге нисъелла (9,6%).
Оцу Iилманан талламехь дуьйцу, мел хан йойъу Оьрсийчоьнан регионашкара бахархоша болх лохуш.
ГIалгIачохь уггара кIезга хан йойъу болх лохуш – юккъерчу барамехь 6,9 бутт. Нохчийчохь болх лохуш 7,7 бутт хан йойъу, ГIебартойн-Балкхаройчохь – 9,7, Дагестанехь – 9,9, Къилбаседа ХIирийчохь – 11,7, Кхарачойн-Чергазийчохь – 12,6 бутт.
Уггара кIезга белхазалла Къилбаседан Кавказан регионашлахь Ставрополан махкахь ю – 56-гIа меттиг (4,8%). Рейтингехь дуьххьара меттиг кхаьчна Санкт-Петербургана 1,5% белхазаллица.
Хьалхо СКФО-н ерриг регионаш а, Краснодаран мохк, ГIалмакхойн чоь, Адыгея а хIора шарахь хIотточу ипотека эца аьтто хиларан рейтинган тIаьххьарчу меттигашка нисъеллера. Къилбаседа Кавказехь 17% доьзалийн бен аьтто бац хIусам эцархьарама банкера юхалург ахча эца.
HeadHunter онлайн-рекрутинган хаамца, Къилбаседа Кавказехь болх лохуш 1-3 бутт болу, аьлла белхазаллехь бехачу нехан кхоалгIачу декъо, 9% наха шаьш эха шарахь лоьху къахьега меттиг, боху, ткъа 26% респонденташ болх лоьхуш лела, лаххара а, цхьана шарахь.
Бахархойн юкъараллин Фондан талламца а догIуш, Оьрчийчохь уггара кIезга алапаш ду Нохчийчохь – 30 эзар, Дагестанехь – 32,3 эзар, ГIебартойн-Балкхаройчохь – 32,6 эзар, ГIалгIайчохь – 35,1 эзар.