Ингушетиядә дистәләгән укучының БДИ нәтиҗәләрен гамәлдән чыгарганнар
Ингушетиядә төрле шпаргалкалар һәм җайланмалар аркасында Бердәм дәүләт имтиханы нәтиҗәләре юкка чыгарылган дистәләгән укучының әти-әнисе судта балаларының белемнәрен яклап чыккан. Бер кызны кулына Коръән аяте язып килгән өчен имтиханнан чыгарып җибәргәннәр. Бу хакта BAZA Телеграм-каналы яза.
Ингушетиядә Бердәм дәүләт имтиханы тапшырган вакытта бөтен республика буенча 80нән күбрәк эшне гамәлдән чыгардылар. 15 нче мәктәптә генә дә имтиханның берничә көненә 30 укучыны чыгарып җибәргәннәр. Финал ведомостьта имтиханнан чыгарып бибәрелгән укучыларга махсус билге куелган була – янәсе, алар микронаушниклар, шпаргалкалар һәм башка хәйләләр кулланган. Бер укучы кызны уч төбенә Коръән аяте язып килгән өчен имтиханнан чыгарып җибәргәннәр. Имтиханны күзәтеп торучылар моны кагыйдәләрне боза дип тапкан, хәер, укучы үзе моны бары тик уңыш китерсен өчен генә язуын, монда бернинди «подсказкалар» булмавын әйткән.
Фото: © BAZA Телеграм-каналы
Әти-әниләр позициясе. Алар сүзләренчә, укучыларның күбесе үз балларын лаеклы алган. Укучыларның бернәрсә дә кулланмавы, хәтта камераларда да күренә. Әти-әниләрнең бер өлеше балаларының билгеләрен судта якларга карар итә – алар Магас районы судына шикаять яза һәм судны ота. Суд имтихан нәтиҗәләрен раслау карары чыгара, әмма әлегә нәтиҗәләр килмәгән һәм укучыларның әти-әниләре балалар югары уку йортларына документлар тапшырырга өлгермәс дип борчыла.
Мәгариф министрлыгы позициясе. Түрәләр фикеренчә, нәтиҗәләрне юкка чыгару дөрес. Шпаргалкалар кулланган дип шикләнелгән укучыларга махсус тамга куелган. Соңыннан күзәтүчеләр бу тамгаларны раслаган – шуннан соң укучыларның имтихан нәтиҗәләрен гамәлдән чыгарганнар.