Литва россиялик журналистга қочқин мақомини берди
“Якуний қарор билан Евгений Титовга қочқин мақоми берилганини тасдиқлаймиз”, деб билдирди Литва Ички ишлар вазирлиги қошидаги миграция департаменти раҳбари Эвелина Гудзинскайте.
Ўтган йилнинг февралида миграция департаменти Титовга қочқин мақомини беришдан бош тортган эди. Бу қарорни Вильнюс суди ҳам тасдиқлаган. Бироқ Титов ўз иши қайта кўриб чиқилишини илтимос қилиб, аппеляция тартибида шикоят аризаси киритган эди.
Евгений Титов Озодлик радиоси рус хизмати билан 2007-2016 йиллар давомида ҳамкорлик қилган. У Краснодар ўлкасида инсон ҳуқуқларининг бузилиши ҳолатларини ёритиб борган.
Титов 2015 йилда Россиядан Қримга кўприк қурилаётгани тўғрисида мақола қилаётган пайтда унинг ортидан доимий равишда кузата бошлаганлар. Орадан кўп ўтмай, россиялик таниқли журналистларга, жумладан, Аркадий Бабченкога “Женя Титов Темрюкда ўлдириб кетилди”, деган СМСлар келган.
Бир неча мурожаатларга қарамай, ҳуқуқ-тартибот тузилмалари Титовнинг ортидан кузатиб юрган шахсларни ва СМС юборган одамларни топмаган.
2015 йилнинг кузида Титов Россияни тарк этишга қарор қилган.