Бикчәнтәев урынбасар алмаштыра: Рәхим итегез, Лилия ханым! Хушыгыз, Эльмира ханым!
Татарстан театр эшлеклеләре берлеге рәисе Фәрит Бикчәнтәевның урынбасары булып Лилия Гәрәева килде.
Бу хәбәрне ишеткәч тә, иртән үк юл өстендәге Театр эшлеклеләре берлегенә сугылып чыккан идем, чөнки аларда әле җавап алынмаган бер запрос ята. Кабинетта Лилия Гәрәева белән байтак еллар бу урынны биләп торган Эльмира Фәтхуллинаны очраттым.
«Әйе, гариза яздым. Эшли дә башладым дияргә була», – диде Лилия Гәрәева.
Аңа Тинчурин театрыннан киткәч тә, берничә урыннан эш тәкъдиме булган икән. Ул байтак еллар театрда эшләгәч, театрга якын кеше булгач монысын сайлаган – үзе әйтте.
Әмма Лилия Гәрәева «Калеб» белән эшләвен дә ташламаячак – төрле чаралар да үткәреп торачак. Бу турыда һәм аның яңа вазифадагы планнары турында без ул эшкә керешкәч соңрак сөйләшербез.
Лилия Гәрәеваның театр дөньясында активлыгы Кариев театрына директор булып Гүзәл Сәгыйтова килгәч, аның урынбасары булудан башланды. Аннары берничә ел Тинчурин театрында директор урынбасары булып эшләде. Быел ул, контракты бетеп булса кирәк, Тинчурин театрыннан билгесез сәбәпләр белән китеп барды. Бу Айдар Җаббаровның театрга баш режиссер булып килүе вакытына туры килде.
Татарстан театр эшлеклеләре берлеге рәисе урынбасары вазифасын 10 ел чамасы Эльмира Фәтхуллина биләде. Ул бу урында Татарстанның халык артисты Рушания Юкачеваны алыштырган иде. Эльмираның алга таба кайда китәчәге һәм СТДда кадрлар алмашынуның сәбәбе билгеле түгел. Аны Фәрит Бикчәтәев Татарстан театр эшлеклеләре берлеге идарәсенә дә сайлаган иде. Идарә әгъзаларын съезд гына раслый ала, димәк, Эльмира Фәтхуллина идарәдә кала дип аңлыйбыз.
- Фәрит Бикчәнтәевның командасы, ул сайлаган идарә (үзе әйткәнчә, «эш атлары»): Эдуард Баһаветдинов (Казан дәүләт опера һәм балет театры директоры урынбасары), Илнур Гайниев (Кариев театры директоры), Илгиз Зәйниев (Камал театрының сәнгать җитәкчесе, «Әкият» курчак театрының сәнгать җитәкчесе, драматург, режиссер, РФ Театр эшлеклеләре берлеге сәркатибе), Олег Кинҗәгулов (Чаллы театры сәнгать җитәкчесе), Руфина Таҗетдинова (Казан театр училищесы директоры), Эльмира Фәтхуллина (үз урынбасары, Актерлар йорты директоры), Диләрә Хөсәенова (Качалов театрының сәнгать җитәкчесе ярдәмчесе, башкарма директор), Гүзәл Шакирҗанова (Казан ТЮЗы актрисасы).
Эльмира Фәтхуллинаның китү сәбәбе Россия Театр эшлеклеләре берлегенең «...яңа алымнар кирәк, актив лидерлар кирәк. Өстән кушылганга кушылып китәргә әзер торган кәнәфидә утыручылар түгел» диюенә бәйле түгелме икән?
Съездда РФ Театр эшлеклеләре берлеге вәкиле Андрей Артемьев: «Шундый зур ресурс - республика җитәкчелегеннән һәм үзәк аппараттан шундый игътибар булгач, шундый зур базагыз булгач, СТДның үзәк аппараты Татарстан бүлегеннән күбрәкне көтә. Сезнең бүлек иң эре генә түгел, үрнәк булсын иде, флагман булсын иде – аңа башкалар тигезләнергә тырышсын. Ни кызганыч, әлегә бу күренми. Без бүлек үсешендә уңай тенденцияләр күрмибез. Без билгеле бер стагнация күзәтәбез. Зур ярдәм бар – аңа тигез дәрәҗәдә нәтиҗә юк. Хәзерге вакыт өчен яңа алымнар кирәк, актив лидерлар кирәк. Өстән кушылганга кушылып китәргә әзер торган кәнәфидә утыручылар түгел, үзләре идеяләр белән чыгучылар кирәк, актив лидерлар кирәк! Иң мөһиме – яңару кирәк... Бүлек ябык клубка әйләнергә тиеш түгел...» дип чыгыш ясаган иде.