Ялларда Татарстанда кабат айлык нормага кадәр явым-төшем көтелә
Бу ялларда актив фронталь бүлекләр Татарстанга кабат тотрыксыз һәм карлы һава торышы алып килә, шулай ук бераз температура да күтәреләчәк. Бу хакта республиканың Гидрометеорология үзәгенә сылтама белән «Татар-информ» яза.
7-9 февраль көннәрендә Татарстан территориясендә, шул исәптән Казанда, һава торышы нык үзгәрә. Төбәк аша уза торган атмосфера фронтлары аркасында уртача һәм көчле кар явачак, буран була, күз күреме сизелерлек начарлана, юлларда бозлавык һәм кар көртләре барлыкка киләчәк.
Синоптиклар мәгълүматы буенча, бу өч көндә республиканың күпчелек өлешендә 10 – 25 мм явым-төшем булырга мөмкин, бу айлык норманың яртысыннан алып тулы нормасына туры килә. Иң күп явым-төшем көнбатыш районнарда һәм Казанда көтелә.
Шимбәгә, 7 февральгә, каршы төндә төбәкнең көнбатыш өлешендә урыны белән бераз кар явачак. Көндез күпчелек районнарда кар ява, көнбатыш районнарда урыны белән көчле кар, кайбер районнарда буран була. Төнлә һава температурасы -14..-19 (аязганда көнчыгыш районнарда -23), көндез -7..-12 градус була.
Якшәмбе, 8 февральдә, бөтен республикада кар явуы фаразлана. Урыны белән көчле кар явачак, кайбер районнарда буран дәвам итә. Төнлә һава температурасы -8..-13, көндез -5..-10 градус була.
Дүшәмбегә каршы төндә, 9 февральдә, шулай кар явачак. Көндез фронталь система көнчыгышка таба чигенә һәм атмосфера басымы арта, шуңа күрә явым-төшем кими, шулай да кайбер урыннарда бераз кар яву сакланачак әле. Төнлә һава температурасы -11..-16, көндез -8..-13 градус.
Метеорологлар мәгълүматы буенча, сишәмбе, 10 февральдә, явым-төшем ихтималы аз. Төнлә һава температурасы -19..-24, көндез -10..-15 градус булачак.