Кино. Ел вакыйгалары – бар да уртача: алып мактамыйбыз, салып таптамыйбыз
«Татаркино», прокат оешмасы буларак, иң күп керемне кыргыз фильмы белән алган.
«Татаркино» оешмасы прокат белән барлыгы 60 533 683 сум акча эшләгән, шул исәптән, Пушкин картасы белән – 29 687 220 сум.
«Безнең прокатта «Рай под ногами матерей» кыргыз фильмы уңышлы барды. Ул Россия буенча да 80 миллион сумнан артык керем җыйды. Минем фикеремчә, беренчедән, бу – кирәкле тема, Коръәннән алынган сүзле исеме дә тартып тора. Икенчедән, актер бик яхшы. Прокат узган татар фильмнары күп түгел, «Мишка» һәм «883 км» күпмедер дәрәҗәдә прокатта булган.
Илдар Юзеевның иң популяр әсәрләренең берсе – «Гашыйклар тавы» кино форматында чыкты
Салават Юзеев әтисе, халык шагыйре Илдар Юзеевның «Гашыйклар тавы» әсәре мотивлары белән «Гашыйклар тавы» фильмын чыгарды. Фильм «Алтын мөнбәр» Казан халыкара кинофестивалендә «Иң яхшы режиссер» һәм «Иң яхшы сценарист» номинацияләрендә җиңде. Алматыда узган «Евразия» халыкара кинофестивалендә «Иң яхшы хатын-кыз роле» номинациясендә җиңү яулады.
Зөлфәт Хәкимнең «Телсез күке» әсәре кино булып чыкты, һәм анда язучы үзе уйнады
Зөлфәт Хәкимнең «Телсез күке» пьесасы нигезендә «Немая кукушка» фильмы чыкты. Фильмда татар артистлары Сәйдә Мөхәммәтҗанова, Инсаф Нәҗипов һәм башкалар уйнады. Фильмда Зөлфәт Хәкимнең үзенә дә роль бирелгән.
«Карурман» фильмы чыкты һәм пафослы шартларда ябык күрсәтелде
Фото: © трейлердан стопкадр
Радик Кудояровның Муса Җәлил образын күрсәткән «Карурман» фильмы Муса Җәлил исемендәге Татар дәүләт опера һәм балет театрда ябык күрсәтелде. Миләүшә Айтуганова әйтүенчә, фильмны прокатка чыгару тәкъдиме булган, әмма режиссер башта аны кинофестивальләргә тәкъдим итү ягында.
Татарстан кинематографиясе 100 еллык юбилеен уздырды
Кинофестиваль исемен алыштырды
«Казан халыкара мөселман киносы фестивале» исемен үзгәртте – «Алтын мөнбәр» халыка кинофестивале» дип атала башлады. Быел ул Казанда 20нче мәртәбә уздырылды.
Халык язучысы Мөхәммәт Мәһдиевнең «Кеше китә, җыры кала» әсәре буенча телесериал төшерелде
«Кеше китә – җыры кала» телесериалы «ТНВ-Яңа гасыр» телеканалы заказы белән төшерелә. Режиссеры – Александр Далматов. Телеканал аны 2025 елда күрсәтергә вәгъдә итә.
Телесериал көткәндә
Фото: © Михаил Захаров
«Кеше китә – җыры кала» – матур стильле әсәр. Чын Мәһдиев телендә язылган. Киләсе елга Бөек Җиңүнең юбилей елы – 80 еллыгы да. Шуңа күрә дә аеруча актуаль», – ди Марат Әхмәтов телесериалның тантаналы «тәлинкәсен» ватканда. «Кино – ул халыкка иң якын сәнгать әсәрләренең берсе. Бу турыда миңа кадәр дә күпме олпат затларыбыз әйткән. Классик әсәрләр буенча фильмнар төшерү, һичшиксез, безнең әдәбиятны да, мәдәниятне дә баетачак», – дигән Ркаил Зәйдулла.
Әлмәт театры киноспектакль чыгарды
Әлмәт театры Равил Сабырның «Фәхрине үтереп ташладылар» романы буенча «Фәхрине үтереп ташладылар» («Бер хыянәт тарихы») киноспектаклен чыгарды. Режиссерлары – Александр Далматов һәм Динар Хөснетдинов. Киноспектакльнең кино өлеше 7 съемка көнендә Казанда һәм Әлмәттә төшерелде. Кино өлешендә бөтен труппа төште.
Үзбәкстан белән бергә Мәрҗани турында кино төшереләчәге игълан ителде
Казан дәүләт мәдәният институтында узган «Копродукция как драйвер развития киноиндустрии» түгәрәк өстәлендә Салават Юзеев Шиһабетдин Мәрҗани шәхесенә багышланган «Мөгаллим» фильмы проектын тәкъдим итте. Быел фильм Үзбәкстан белән копродукция буларак төшерелә башлый.
Туфан Миңнуллинның «Әниләр һәм бәбиләр» пьесасы буенча фильм төшереләчәге игълан ителде
Фильм «Татар халкының милли тәңгәллеген саклау» дәүләт программасы кысаларында төшереләчәк. Режиссерлар – Ирек Хафизов һәм Юлия Захарова. Киносценарийны Айгөл Әхмәтгалиева язган.