Татарстанда аномаль эсселек саклана, боз яву һәм көчле җил көтелә
(Казан, 28 июнь, «Татар-информ»). Иртәгә, 29 июньдә, Татарстан антициклон перифериясе йогынтысында булачак. Шул сәбпәле, аномаль эссе тотрыксыз һава торышы сакланачак. Атмосфера фронты узу сәбәпле, һава шартлары начарлануы фаразлана.
Татарстан Гидрометеорология һәм әйләнә-тирә мохитне күзәтү үзәге хәбәр иткәнчә, республикада алмашынучан болытлы һава булачак. Төнлә, шулай ук көндез, төбәктә урыны белән кыска вакытлы яңгыр һәм яшен булырга мөмкин. Урыны белән боз да фаразлана.
Көньяк-көнчыгыштан уртача тизлектә искән җил тәүлек дәвамында юнәлешен көньяк-көнбатышка үзгәртәчәк. Яшен вакытында җилнең тизлеге секундына 15-20 метрга кадәр көчәергә мөмкин. Урыны белән җилнең тизлеге секундына 23 метрга кадәр җитәчәк, дип хәбәр итә синоптиклар.
Төнлә һава температурасы +19…+24 градуска кадәр җылы булачак. Көндез һава температурасы +32…+37 градуска кадәр күтәреләчәк. Татарстанның көнчыгыш һәм көньяк-көнчыгыш районнарында бигрәк тә эссе булачак.