(Казан, 19 август, «Татар-информ»). Бүген Татарстан Президенты Рөстәм Миңнеханов рәислегендә Татарстан Республикасы Инвестицион советының чираттагы утырышында җиде проект хупланды. Алар арасында «Масловка» аэрошәһәрчеген һәм кан плазмасын фракцияләү буенча завод төзү бар. Бу турыда ТР Президентының матбугат хезмәте хәбәр итте. «ИТЛЕ КИТЧЕН» компаниясе индивидуаль һәм бергә төргәкләнгән әзер ашамлык продуктларын үзендә җитештерүне оештыру турында проект тәкъдим итте. «Зеленодольск» сәнәгать паркы территориясендә кирәкле югары технологик җайланмалары булган җитештерү-склад урыннары төзү планлаштырыла. Эшчәнлекне 2021 елда башлап җибәрергә җыеналар. Елына әзер ашамлык күләме 3,6 мең тонна җитештерелер дип фаразлана. «Консорциум строительных компаний» ҖЧҖ «HalalGuideMall» сәүдә үзәге проектын булдыру проектын тәкъдим итте. Проект хәләл яшәү рәвешен үстерүгә юнәлә. Хәләл ризык, хәләл-шопинг һәм хәләл-фитнес юнәлешләренә басым ясала. UBC Grouрка керүче «Умные машины» ҖЧҖ заманча сәүдә суыткыч җайланмаларын җитештерүне оештырырга ниятли. Нәтиҗәдә елына 30 меңгә кадәр җайланма җитештерү күзаллана. 300 яңа эш урыны булдыру планлаштырыла. Татарстан Республикасы Авиация һәвәскәрләре федерациясе Балык Бистәсе районында «Масловка» аэрошәһәрчеген булдыру проектын эшләгән. Проект концептуаль инновацион бистә булдырырга юнәлгән, максаты — кече һәм эшлекле авиацияне, балаларның авиация-техник иҗатын үстерү, шәһәрдән читтә актив ял зонасы булдыру. «Alishech Ltd.» Израиль компаниясе республика территориясендә кан плазмасын фракцияләү буенча завод төзергә тели, җитештерү куәте елына 500 тонна эшкәртелгән плазма булачак. «ХЭДМЕЙД» компаниясе зиратлар эшчәнлеген автоматлаштыру һәм мәетләрне җирләү буенча хезмәт күрсәтүләрне яхшырту буенча «Мемориал» проектын тәкъдим итә. Система 2015 елда эшләтеп җибәрелгән һәм Казанның 13 зиратында гамәлгә кертелгән. Азакта «Түбән Кама» сәнәгать паркының икенче чиратын үстерү буенча инвестицион проект каралды, торгларсыз гына Татарстан Республикасы Президенты күрсәтмәсе нигезендә арендага җир кишәрлеге алырга дәгъва кылына. Яңа мәйданчыкта 20 яңа резидент урнаштыру һәм 1,6 меңгә кадәр яңа эш урыны булдыру планлаштырыла. Утырышта катнашучылар барлык проектларны да хупладылар. Рөстәм Миңнеханов билгеләп үткәнчә, бу катлаулы икътисади хәлләрдә потенциаль инвесторлар белән эшне активлаштырырга һәм алар эше өчен тиешле шартлар тудырырга кирәк.
