Татарстан Дәүләт Советы Казахстанда самолет төшүгә бәйле рәвештә кайгы уртаклашты
(Казан, 28 декабрь, «Татар-информ»). Татарстан Дәүләт Советы Рәисе Фәрит Мөхәммәтшин Алма-Атадан Нур-Солтанга очкан авиалайнерның һәлакәтенә бәйле рәвештә Казахстан Парламенты Сенаты Рәисе Дарига Назарбаеваның, Парламент Мәҗлесе рәисе Нурлан Нигъмәтуллинның һәм Казахстанның Казандагы Генераль консулы Жант Мурзалинның кайгысын уртаклашты.
«Татарстан Республикасы Дәүләт Советы депутатлары исеменнән һәм шәхсән үз исемемнән „Бек Эйр“ авиакомпаниясенең пассажир самолеты һәлакәтенә бәйле рәвештә кайгыгызны уртаклашам. Казахстанның тугандаш халкына килгән кайгыны уртаклашабыз, — диелә телеграммада. — Туганнарын һәм якыннарын югалткан кешеләргә кайгы уртаклашу һәм теләктәшлек сүзләрен җиткерүегезне, шулай ук барлык зыян күрүчеләргә тизрәк савыгу теләген җиткерүегезне сорыйм».
Авиаһәлакәт кичә Алма-Ата шәһәре янында була. Bek Air авиакомпаниясенең Fokker-100 самолеты очып киткәннән соң берничә минуттан соң ватыла. Һава судносы бетон киртәне тишкән һәм төзелә торган йортка бәрелгән. Бортта йөзгә якын кеше булган, шул исәптән экипаж да. 12 кеше һәлак булган.
Бүген Казахстанда гомуммилли матәм игълан ителде. Казандагы Генераль консуллыкта матәм уңаеннан кайгы уртаклашу китабы ачылды.
Фаҗига белән бәйле рәвештә Россия Президенты Владимир Путин да кайгыларын уртаклашты.