Россияда Toyota Camry ўрнини эгаллайдиган Сенат 900 седани тақдим этилди
Аурус брендининг арзонроқ ва халқчил суббренди сифатида тақдим этилган Сенат компанияси ўзининг илк модели — Сенат 900 седанининг расмий суратларини ва техник хусусиятларини эълон қилди. Ушбу автомобил Ҳонгқи Ҳ9 моделининг чуқур модернизация қилинган версияси ҳисобланиб, ўзининг йирик ўлчамлари билан вакиллик синфидаги седанлар қаторидан жой олади. Бу ҳақда Ixbt.com хабар беради.
Автомобил 3,0 литрли, 326 от кучига эга В6 турбомотор билан жиҳозланган. 450 Нм айланиш моментига эга двигател 8 поғонали автомат узатмалар қутиси ва тўлиқ узатмали тизим билан ҳамкорликда ишлайди. Ишлаб чиқарувчининг маълумотларига кўра, седан 100 км/соат тезликка 6,5 сонияда эришади.
Моделнинг жиҳозланишига пневматик осма тизим, шовқинни ютувчи махсус қатламлар, табиий тери ва ёғочдан ишланган интерер ҳамда орқа ўриндиқлар учун массаж функцияси киради. Шунингдек, медиа тизим тўлиқ рус тилига мослаштирилган бўлиб, фойдаланувчилар учун қулай интерфейсни тақдим этади.
Сенат 900 моделининг оммавий тақдимоти 2026-йил 4-июн куни Петербург халқаро иқтисодий форумида бўлиб ўтади. Автомобилларни ишлаб чиқариш Санкт-Петербургдаги собиқ Toyota заводида йўлга қўйилиши режалаштирилган, бу ерда аввал Toyota RAV4 ва Toyota Camry моделлари йиғилган эди.