Грилиш яна диққат марказда, бардаги ҳолати мухлисларни ҳайратга солди

«Манчестер Сити»га тегишли бўлган ва ҳозирда ижара асосида «Эвертон» сафида тўп сураётган Жек Грилиш яна бир бор жамоатчилик диққат марказига тушди. Бу сафар у майдондаги ўйини билан эмас, балки майдон ташқарисидаги ҳолати билан муҳокамаларга сабаб бўлмоқда.

The Sun нашри тарқатган маълумотларга кўра, футболчи Манчестердаги барлардан бирида дўстлари билан дам олаётган пайтда кутилмаган ҳолатга дуч келган. Гувоҳларнинг айтишича, Грилиш бар томида ухлаб қолган ва уни уйғотиш учун дўстлари анча уринган. Бу ҳолатга эса кўп миқдорда алкоголь истеъмоли сабаб бўлгани таъкидланмоқда.

Маълум қилинишича, операциядан кейин тикланиш жараёнини бошдан кечираётган футболчи катта эҳтимол билан мавсумнинг қолган қисмини ўтказиб юборади. Шунингдек, у Англия терма жамоасининг 2026 йилги жаҳон чемпионати учун таркибига кирмаслиги мумкин.

Эслатиб ўтамиз, март ойида Грилиш ижтимоий тармоқлар орқали тикланиш жараёни ҳақида маълумот бериб, янада кучли ҳолатда қайтиш учун иш олиб бораётганини айтган эди. Ўшанда у гипсдан махсус ҳимоя ботинкасига ўтган ва ҳаракатланиш учун махсус скутердан фойдаланган.

Бироқ реабилитацияга қарамай, у турли тадбирларда ҳам кўриниш бермоқда. Жумладан, «Эвертон» дарвозабони Жордан Пикфорд билан бирга Рим шаҳрига сафар қилиб, дўстона муҳитда байрамларда иштирок этгани ҳам қайд этилди.

Айтиш жоиз, Грилиш аввалдан базм ва кечаларни яхши кўрувчи футболчи сифатида танилган. Унинг майдон ташқарисидаги ҳаёти кўп бор оммавий ахборот воситаларида муҳокама қилинган.

Қисқача айтганда, Грилиш ҳали тикланишда, лекин “режим” масаласи ҳали ҳам савол остида.